5 кастрычніка ў бібліятэцы (2-гі паверх, кальцавы калідор) прайшло ўрачыстае адкрыццё выстаўкі “Фундаментальная бібліятэка БДУ: 95 гадоў на службе ўніверсітэцкай адукацыі”.
Экспазіцыя адлюстроўвае гісторыю стварэння бібліятэкі і яе дзейнасць на сучасным этапе.
Першая частка выстаўкі – гістарычная – распавядае пра арганізацыю Беларускай дзяржаўнай і ўніверсітэцкай бібліятэкі і ахоплівае перыяд 1922–1925 гг. Значная частка экспазіцыі прысвечана першаму рэктару Беларускага дзяржаўнага ўніверсітэта (БДУ) Уладзіміру Іванавічу Пічэту, які адыграў вялікую ролю ў фарміраванні бібліятэчных фондаў. Прадстаўлены прыжыццёвыя выданні прац рэктара, кнігі вядомых вучоных з дароўнымі надпісамі, а таксама разнастайныя выданні, прысвечаныя яго жыццю і дзейнасці: кнігі, дысертацыя, біябібліяграфічны паказальнік, СД-дыск.
У экспазіцыі прадстаўлены кнігі з калекцый, перададзеных Беларускай дзяржаўнай бібліятэцы пасля вылучэння яе ў самастойную арганізацыю ў 1926 г.
Сярод экспанатаў пачэснае месца займаюць найбольш каштоўныя выданні з фондаў ФБ БДУ: “Шесть писем о республике” Жана Бадэна (1580), “Арифметика” Л. Магніцкага (1703), “Словарь белорусского наречия” І.І. Насовіча (1870) з аўтографам аўтара, факсімільнае выданне “Лицевого летописного свода” Івана Грознага, мініяцюрныя выданні і ўзоры паліграфічнага майстэрства XIX – пачатку XX ст.
Адзін з раздзелаў выстаўкі прысвечаны дырэктарам бібліятэкі. Пра іх дзейнасць расказваюць не толькі фотадакументы, але і кнігі, падораныя ім або напісаныя імі. Кніга І.У. Арахоўскай “Библиотечные тайны” прысвечана яе роднай бібліятэцы, супрацоўнікам і чытачам.
Цэнтральную частку экспазіцыі складаюць вучэбныя выданні як аснова фонду ўніверсітэцкай бібліятэкі. Экспануюцца дарэвалюцыйныя выданні прафесараў БДУ, падручнікі з уладальніцкімі знакамі, шматлікія серыйныя вучэбныя выданні БДУ, а таксама расійскія падручнікі з серыі “Классический университетский учебник”, падораныя рэктарам Маскоўскага дзяржаўнага ўніверсітэта да 85-годдзя ўніверсітэта.
Навуковыя выданні прадстаўлены першымі выпускамі прац БДУ, вучоных запісак і ўніверсітэцкіх перыядычных выданняў. Асаблівы трэпет выклікаюць першыя дысертацыі – аддрукаваная на пішучай машынцы ў 1936 г. і напісаная ад рукі ў 1941 г.
Асабліва каштоўныя кнігі з аўтографамі і словамі ўдзячнасці ў адрас бібліятэкі ад выкладчыкаў і выпускнікоў універсітэта – рэктара БДУ акадэміка С.У. Абламейкі, народных пісьменнікаў Н. Гілевіча, Г. Барадуліна, Г. Бураўкіна.
Важны кірунак дзейнасці бібліятэкі ВНУ – гэта пазавучэбная работа са студэнтамі, якая прадстаўлена двума аб’яднаннямі: кінаклубам “Фруза” і клубам аматараў мастацкага слова “Клумба”.
Завяршаюць экспазіцыю матэрыялы, прысвечаныя дзейнасці Каардынацыйнага і метадычнага цэнтра бібліятэк УВА Беларусі. Прадстаўлены зборнікі матэрыялаў канферэнцыі “Менеджмент вузовских библиотек”, нарматыўныя дакументы.
Выстаўка, багата ілюстраваная фатаграфіямі і прадукцыяй з універсітэцкай сімволікай, падрыхтавана сумеснымі намаганнямі супрацоўнікаў Нацыянальнай бібліятэкі Беларусі і Фундаментальнай бібліятэкі БДУ.
Кантактны тэлефон: (8 017) 209 50 41.
 |
 |
 |
 |
 |
 |
 |
 |
 |
 |
 |
 |
 |
 |
 |
