З 3 лютага да 6 чэрвеня ў бібліятэцы (3-ці паверх, кальцавы калідор) працуе выстаўка “Дзевяць стагоддзяў Слуцка”, прымеркаваная да 900-годдзя з часу першага ўпамінання горада.
Слуцк – адзін з найстаражытнейшых гарадоў беларускай зямлі. Упершыню ён згадваецца ў летапісе “Аповесць мінулых гадоў” у 1116 годзе.
Гісторыя Слуцка непарыўна звязана з гісторыяй беларускага народа на розных этапах яго развіцця. У розныя часы тут княжылі: унук вялікага князя Уладзіміра Манамаха – Уладзімір Мсціслававіч, Рурыкавічы, Алелькавічы, Радзівілы. Гісторыя горада – гэта гісторыя барацьбы супраць іншаземных захопнікаў, развіццё суконнай і палатнянай прамысловасці. У Слуцку ткаліся ўсім вядомыя паясы з шоўку, золата і серабра, якія і сёння з'яўляюцца жамчужынай дэкаратыўна-прыкладнога мастацтва Беларусі і гонарам многіх музеяў свету. У горадзе была свая друкарня. Славіліся майстэрствам мясцовыя ювеліры і кастарэзы. У 1624 годзе князем Янушам Радзівілам была адкрыта кальвінісцкая гімназія – найстарэйшая ў Беларусі.
Сучасны Слуцк – гэта горад з насельніцтвам каля 70 тысяч жыхароў. У цяперашні час у Слуцку працуе 20 прамысловых прадпрыемстваў: дрэваапрацоўчыя “Слуцк-Модуль” і “Слуцкмэбля”, завод мастацкіх промыслаў “Слуцкія паясы”, тэкстыльная фабрыка, завод “Эмальпосуд” і інш. Слуцк актыўна развівае культурныя і сацыяльна-эканамічныя сувязі.
На кніжнай выстаўцы прадстаўлена каля 150 дакументаў. Гэта літаратура па гісторыі горада, энцыклапедыі і даведачныя выданні, кнігі пра вядомых людзей, што нарадзіліся на зямлі слуцкай.
Цікава азнаёміцца з кнігай “Древнерусский город Слуцк и его святыни”, выдадзенай у Вільні ў 1896 годзе. Выданне ўпрыгожана шасцю гравюрамі.
Спецыяльны раздзел выстаўкі прысвечаны слуцкім паясам і гісторыі ткацкіх мануфактур.
Кніга “Слуцк на старых паштоўках” пазнаёміць чытача з відамі Слуцка канца XIX – пачатку XX стагоддзя.
Кантактны тэлефон: (8 017) 293 28 86.
