З 7 па 30 верасня ў зале дакументаў міжнародных арганізацый (2-гі паверх, пам. 207g) адкрыта тэматычная выстаўка “Дэмакратыя і сучасны свет”, прысвечаная Міжнароднаму дню дэмакратыі.
Міжнародны дзень дэмакратыі – новае свята ў сістэме ААН. Ён адзначаецца штогод 15 верасня, пачынаючы з 2008 года. Гэты дзень быў абвешчаны 8 лістапада 2007 года Генеральнай Асамблеяй ААН у рэзалюцыі, прысвечанай падтрымцы намаганняў урадаў па развіцці і ўмацаванні дэмакратый (A/RES/62/7). У рэзалюцыі прапануецца дзяржавам-членам ААН, іншым рэгіянальным, міжурадавым і няўрадавым арганізацыям адзначаць гэты дзень з мэтай павышэння інфармаванасці грамадскасці аб стане дэмакратыі ў свеце. “Дэмакратыя – гэта не толькі мэта, але і працэс, і толькі пры поўным удзеле і падтрымцы міжнароднай супольнасці, дзяржаўных органаў улады, грамадства і асобных грамадзян ідэалы дэмакратыі можна ажыццявіць для кожнага чалавека ў кожным кутку свету”, – гаворыцца ў дакуменце.
Міжнародны дзень дэмакратыі быў абвешчаны для азнаменаванне прыняцця Міжпарламенцкім саюзам у 1997 годзе Усеагульнай дэкларацыі аб дэмакратыі. Прыняцце гэтага дакумента стала важнай вехай на шляху развіцця дэмакратыі. Сёння Дэкларацыя служыць крыніцай інфармацыі і падтрымкай, калі гаворка ідзе пра асноўныя прынцыпы дэмакратыі, элементы і стандарты дэмакратычнага кіравання і міжнародныя аспекты дэмакратыі. У дакуменце падкрэсліваецца, што “дэмакратыя – гэта універсальная каштоўнасць, заснаваная на свабодным волевыяўленні народа, які вызначае свае палітычныя, эканамічныя, сацыяльныя і культурныя сістэмы”.
Дэмакратыя адносіцца да універсальных і непадзельных асноўных агульначалавечых каштоўнасцей і прынцыпаў Арганізацыі Аб’яднаных Нацый. Яна заснавана на свабодным волевыяўленні народа і цесна звязана з забеспячэннем правапарадку і ажыццяўленнем асноўных правоў і свабод чалавека. Дзейнасць ААН у падтрымку дэмакратыі і кіравання ажыццяўляецца ў рамках Праграмы развіцця Арганізацыі Аб’яднаных Нацый (ПРАНН) праз Фонд дэмакратыі Арганізацыі Аб’яднаных Нацый (ФДААН), Упраўленне Вярхоўнага камісара па правах чалавека (УВКПЧ) і іншыя органы. На падтрымку дэмакратычных працэсаў у свеце толькі праз ФДААН штогод выдзяляецца прыблізна 1,5 мільярда долараў ЗША, дзякуючы чаму Арганізацыя Аб’яднаных Нацый з’яўляецца адной з асноўных арганізацый, якія забяспечваюць тэхнічнае супрацоўніцтва ў галіне ўмацавання дэмакратычных прынцыпаў дзяржаўнага кіравання ва ўсім свеце.
Выстаўка ўключае наступныя тэматычныя раздзелы:
- сучасная дэмакратыя: асноўныя прынцыпы і механізмы;
- развіццё дэмакратыі ў розных краінах свету;
- нацыянальная дзяржава і дэмакратычная сістэма;
- дэмакратыя і правы чалавека;
- дэмакратыя і СМІ.
Экспазіцыя, якая прапануецца чытачам, налічвае каля 60 дакументаў, большую частку якіх складаюць дакументы міжнародных арганізацый (ААН, Еўрапейскага саюза, Савета Еўропы і г.д.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Выстаўка прызначана для палітолагаў, работнікаў органаў дзяржаўнай улады і мясцовага самакіравання, членаў выбарчых камісій, прадстаўнікоў праваахоўных органаў, а таксама для суддзяў, адвакатаў, выкладчыкаў і студэнтаў вышэйшых навучальных устаноў.
Карысныя спасылкі
Дэпартамент па палітычных пытаннях*
Аддзел па аказанні дапамогі ў правядзенні выбараў*
Садзейнічанне дэмакратычнаму кіраванню*
Фонд ААН для развіцця ў інтарэсах жанчын (ЮНІФЕМ)
Вярхоўны камісар ААН па правах чалавека
 |
 |
 |
 |
 |
