З 8 студзеня па 6 лютага ў зале дакументаў міжнародных арганізацый (пам. 207g) ладзіцца кніжная выстаўка “Беларусь і ЮНІСЕФ – грані супрацоўніцтва”, прысвечаная 60-годдзю ўступлення Рэспублікі Беларусь у ЮНІСЕФ.
Дзіцячы фонд Арганізацыі Аб’яднаных Нацый (ЮНІСЕФ) быў створаны ў 1946 г. па рашэнні Генеральнай Асамблеі ААН для дапамогі дзецям, пацярпелым у Другой сусветнай вайне. З 1953 г. арганізацыя ўваходзіць у сістэму ААН як спецыялізаваная ўстанова, дзейнасць якой прысвечана абароне і падтрымцы праў дзяцей усяго свету на бяспечнае, здаровае і шчаслівае дзяцінства.
ЮНІСЕФ працуе ў больш як 190 краінах. Яго цікавяць усе бакі жыцця дзіцяці – здароўе, адукацыя, годнасць, абарона. Дзіцячы фонд ААН перакананы, што прагрэс немагчымы без падтрымання асяроддзя, спрыяльнага паўнавартаснаму развіццю кожнага дзіцяці, і будуе сваю дзейнасць, засноўваючыся на гэтай гуманістычнай пазіцыі. ЮНІСЕФ заклікае да супрацоўніцтва палітыкаў і розныя дзяржаўныя і міжнародныя арганізацыі, праводзіць і падтрымлівае праграмы, накіраваныя на абарону здароўя і жыцця дзяцей, іх фізічнае і інтэлектуальнае развіццё.
Фонд не атрымлівае фінансавання ад Арганізацыі Аб’яднаных Нацый і цалкам залежыць ад добраахвотных ахвяраванняў. Дзіцячы фонд ААН падтрымліваюць індывідуальныя, карпаратыўныя і ўрадавыя донары. Акумулюючы сродкі, якія паступаюць з усяго свету, ЮНІСЕФ накіроўвае іх на праграмы падтрымкі дзяцей, забяспечвае іх самым неабходным, дапамагае ствараць нармальныя ўмовы жыцця для іх і іх сем’яў.
Фонд займаецца праблемамі дзяцей, якія апынуліся ў неспрыяльных умовах, ахвярамі войнаў і іншых відаў насілля, стыхійных бедстваў і крайняй беднасці. Да прыярытэтных задач Дзіцячага фонду ААН адносяцца садзейнічанне развіццю дзяцей у раннім узросце, дзяцей з асаблівасцямі фізічнага развіцця, прафілактыка хвароб, асабліва ВІЧ/СНІДу, падтрымка і абарона праў дзяцей.
Рэспубліка Беларусь з’яўляецца членам Дзіцячага фонду ААН (ЮНІСЕФ) з 1953 г. У 1997 г. у Мінску было адкрыта Прадстаўніцтва ЮНІСЕФ у Рэспубліцы Беларусь. 14 снежня 2007 г. у Нью-Ёрку падпісана Асноўнае пагадненне аб супрацоўніцтве паміж Рэспублікай Беларусь і Дзіцячым фондам ААН, накіраванае на стварэнне неабходных прававых умоў і гарантый для эфектыўнай дзейнасці ЮНІСЕФ у Беларусі. У перыяд 1994–1995 і 2004–2006 гг. Беларусь з’яўлялася членам кіруючага органа ЮНІСЕФ – Выканаўчага савета. У 2009 г. Беларусь у чарговы раз абрана ў Выканаўчы савет ЮНІСЕФ на перыяд 2010–2012 гг.
Супрацоўніцтва Рэспублікі Беларусь з ЮНІСЕФ ажыццяўляецца на праграмнай аснове. У дадзены перыяд рэалізуецца Краінавая праграма ЮНІСЕФ для Беларусі на 2011–2015 гг. – рамачны дакумент, які вызначае стратэгічныя напрамкі супрацоўніцтва ЮНІСЕФ і ўрада.
У рамках Краінавай праграмы распрацоўваюцца і рэалізуюцца праекты, што дазваляюць удасканальваць заканадаўства па абароне праў дзяцей, вывучаць і адаптаваць перадавы замежны вопыт, укараняць новыя тэхналогіі працы, павышаць прафесійны ўзровень спецыялістаў, якія працуюць з дзецьмі.
ЮНІСЕФ рэалізуе ў Беларусі шэраг праектаў міжнароднай тэхнічнай і гуманітарнай дапамогі, накіраваных на падтрымку нацыянальных планаў і прыярытэтаў у сферы абароны мацярынства і дзяцінства, забеспячэння сацыяльнай абароны сям’і, забеспячэння праў дзіцяці, прафілактыкі ВІЧ/СНІДу.
У экспазіцыі прадстаўлена звыш 60 дакументаў на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Выстаўка складаецца з наступных раздзелаў:
- Нацыянальныя і міжнародныя прававыя дакументы па абароне праў дзіцяці.
- ЮНІСЕФ: гісторыя і сучаснасць.
- Дзейнасць ЮНІСЕФ у Беларусі.
Экспазіцыя прызначана для педагогаў, юрыстаў, сацыёлагаў, работнікаў сферы адукацыі, аховы здароўя і культуры, а таксама для ўсіх, хто не раўнадушны да будучыні нашых дзяцей.
Кантактны тэлефон: (8 017) 293 27 34.
Карысныя спасылкі
- UNICEF
- About UNICEF
- UNICEF Executive Board
- UNICEF Executive Director
- UNICEF History
- Statistics and monitoring
- Publications and reports
- ЮНІСЕФ у Беларусі
- Інфармацыйныя кампаніі і праекты
- UNICEF BELARUS ANNUAL REPORT 2010