Працягваецца серыя мерапрыемстваў праекта “На хвалі часу, у плыні жыцця”, які ладзіць да 100-годдзя літаратурнага аб’яднання “Маладняк” Нацыянальная бібліятэка Беларусі сумесна з Дзяржаўным музеем гісторыі беларускай літаратуры, Беларускім дзяржаўным архівам-музеем літаратуры і мастацтва і часопісам “Маладосць”.
13 мая ў Музеі гісторыі беларускай літаратуры літаратуразнаўца, настаўніца, архівіст і пісьменніца Ганна Севярынец пазнаёміла слухачоў з жыццём і творчасцю аднаго з самых таленавітых паэтаў беларускай літаратуры 1920-х гг., сябра літаратурнага аб’яднання “Маладняк” з 1925 г. Паўлюка (Паўла Адамавіча) Труса (1904–1929).
6 мая адзначалася 115-годдзе з дня яго нараджэння. З дапамогай мультымедыйнай прэзентацыі з выявамі Мінска 1920-х гг., партрэтамі літаратараў-маладнякоўцаў і музыкай Дунаеўскага лектар стварыла адпаведны настрой і атмасферу таго часу. На працягу лекцыі прагучаў урывак з вельмі папулярнага тады раманса “Кирпичики”, які П. Трус перарабіў у песню для студэнтак Белпедтэхнікума. Паэт сам быў удзельнікам студэнцкага хору, акцёрам, ставіў п’есы, маляваў дэкарацыі, рэдагаваў насценную газету, апрацоўваў фальклорна-паэтычныя матэрыялы для кампазітараў Н. Сакалоўскага, Р. Пукста і інш.
Пры жыцці выйшлі толькі два яго зборнікі – “Вершы” (1925) і “Ветры буйныя” (1927).
Як пісаў Адам Бабарэка, “Паўлюк Трус – гэта крыніца з беларускіх нетраў, гэта буйны вецер ад маладога жыцця”. Яго творы вырастаюць з прыроднай глебы і фальклору, яны як зіхоткая паўнаводная рака, якая цячэ не з пэўнай мэтай, а толькі таму, што мае выток.
Паўлюк Трус памёр ад тыфу напрыканцы лета 1929 г., было яму ўсяго дваццаць пяць гадоў. Гэта першая смерць у маладой савецкай літаратуры не пакінула раўнадушным нікога. Хаваў яго ўвесь Мінск. У ганаровай варце стаялі Купала, Колас, Гарэцкі, Крапіва, Бядуля, Чорны, Глебка і іншыя пісьменнікі. Многія з яго сяброў па літаратуры будуць пахаваны ў 30-я зусім інакш – без некралогаў, ганаровай варты, аркестра і высокіх прамоў.
Да юбілейнай даты ў Дзяржаўным музеі гісторыі беларускай літаратуры сумесна з Нацыянальнай бібліятэкай Беларусі падрыхтавана выстаўка кніг і фотаздымкаў Паўлюка Труса.
Больш падрабязна з жыццёвым і творчым лёсам паэта можна пазнаёміцца ў артыкуле Г. Севярынец “Здароў, Паўлюк!”, які выйдзе ў межах сумеснага праекта “На хвалі часу, у плыні жыцця” ў № 5 часопіса “Маладосць”.
Матэрыял прадастаўлены інфармацыйна-аналітычным аддзелам.
Чытайце таксама:
