26 студзеня ў бібліятэцы ў рамках праекта “Славутыя імёны Бацькаўшчыны” адбылася экскурсія для навучэнцаў сярэдняй школы № 111 г. Мінска, прысвечаная класіку беларускай літаратуры, вядомаму празаіку, паэту і драматургу Уладзіміру Караткевічу.
Падчас экскурсіі дзеці пазнаёміліся з архітэктурнымі асаблівасцямі будынка Нацыянальнай бібліятэкі Беларусі, яе інфармацыйнымі рэсурсамі і паслугамі, даследавалі прынцып працы электроннага каталога на прыкладзе пошуку твораў знакамітага пісьменніка.
Частка экскурсіі традыцыйна прайшла ў інтэрактыўным фармаце. Экскурсантам была прадэманстравана мультымедыйная прэзентацыя пра жыццёвы і творчы шлях Уладзіміра Караткевіча і тэматычная кніжная выстаўка з фондаў Нацыянальнай бібліятэкі Беларусі. Дзеці даведаліся пра новыя цікавыя факты з біяграфіі пісьменніка, паўтарылі і замацавалі пройдзены ў школе матэрыял, а таксама праверылі свае веды пра творчасць пісьменніка і гісторыю роднага краю падчас выканання творчых заданняў.
У Год малой радзімы ўвазе навучэнцаў таксама былі прапанаваны выданні, прысвечаныя Рагачову – гораду, дзе знаходзіцца дом, пабудаваны дзедам У. Караткевіча Васілём у 1914 годзе, і дзе былі задуманы і напісаны многія знакамітыя творы класіка беларускай літаратуры.
Запрашаем усіх жадаючых на экскурсіі з цыклу “Славутыя імёны Бацькаўшчыны”, прысвечаныя жыццю і творчасці Уладзіміра Караткевіча, Янкі Купалы, Якуба Коласа, Максіма Багдановіча, Кандрата Крапівы, Янкі Маўра, Міхася Зарэцкага, Францыска Скарыны і Марка Шагала.
Матэрыял прадастаўлены аддзелам экскурсійна-метадычнай работы.
