29 красавіка ў музеі кнігі адбылося ўрачыстае адкрыццё выставы “Французскі суперэкслібрыс XVII–XVIII стст.”.
Унікальныя каштоўныя ўзоры французскага пераплётнага майстэрства XVII–XVIII стст. з геральдычнымі суперэкслібрысамі сталі галоўнымі экспанатамі выставы.
З прывітальным словам да прысутных звярнуўся намеснік генеральнага дырэктара Нацыянальнай бібліятэкі Беларусі Аляксандр Аляксандравіч Суша. Ён адзначыў, што фонды бібліятэкі надзвычай багатыя і захоўваюць шырокі спектр кніжных помнікаў розных стагоддзяў. Сярод іх вылучаюцца каштоўныя старадрукі з прыватных французскіх бібліятэк. Кнігі са збораў французскай арыстакратыі маюць адметнае і вытанчанае аздабленне пераплётаў, якія з’яўляюцца бліскучым прыкладам культуры эпохі.
У сваім выступленні Анатоль Мікалаевіч Сцебурака, гісторык і выкладчык Рэспубліканскага інстытута вышэйшай школы, кандыдат гістарычных навук, распавёў аб розных відах уладальніцкіх кніжных знакаў. Ён падкрэсліў, што элітарную пазіцыю сярод іх, безумоўна, займаюць суперэкслібрысы (ад лат. super – зверху і ex-libris – з кніг) – адціснутыя золатам на пераплёце гербы або вензелі. Яны становяцца аб’ектам вывучэння не толькі кнігазнаўства, але вабяць і аматараў геральдыкі, фалерыстыкі, палеаграфіі, генеалогіі. Выступоўца адзначыў, што суперэкслібрысы з’яўляюцца выдатнай інфарматыўнай гістарычнай крыніцай аб інтэлектуальным жыцці Францыі.
Наступны выступоўца, бібліяфіл і калекцыянер гравюр і экслібрысаў, Алег Аляксандравіч Судлянкоў распавёў аб значнасці і каштоўнасці суперэкслібрысаў для калекцый кнігазбору. Запэўніў, што выстава дазваляе бліжэй пазнаёміцца з шэдэўрамі кніжнага пераплётнага мастацтва і выкліча цікавасць як бібліяфілаў, так і шырокага кола наведвальнікаў.
Аўтарскую экскурсію па выставе для гасцей і ўдзельнікаў мерапрыемства правяла Святлана Рыгораўна Пахоменкава, галоўны бібліёграф навукова-даследчага аддзела кнігазнаўства Нацыянальнай бібліятэкі Беларусі.
На выставе быў прадстаўлены таксама вынік выдавецкага праекта “Камплект паштовак. Французскі суперэкслібрыс XVII–XVIII стст.”, падрыхтаванага ў 2020 годзе навукова-даследчым і выдавецкім аддзеламі Нацыянальнай бібліятэкі Беларусі. Набор паштовак усе зацікаўленыя могуць набыць у кіёску бібліятэкі.
Выстава “Французскі суперэкслібрыс XVII–XVIII стст.” будзе працаваць у музеі кнігі (пам. 347) да 31 жніўня 2021 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.
