5 снежня 2007 года ў Варшаве падпісана Пагадненне аб супрацоўніцтве паміж Нацыянальнай бібліятэкай Беларусі і Нацыянальнай бібліятэкай Польшчы.
Подпісы пад дакументам паставілі дырэктары бібліятэк: з беларускага боку Раман Матульскі, з польскага - Томаш Макоўскі. Цырымонія падпісання адбылася ў будынку Нацыянальнай бібліятэкі Польшчы. Дагавор накіраваны на збліжэнне польскай і беларускай культур. Ён прадугледжвае развіццё супрацоўніцтва ў галіне кнігаабмену, міжбібліятэчнага абанемента, выставачнай дзейнасці, навуковых даследаванняў, павышэння кваліфікацыі.
Спецыяльная ўвага нададзена пытанням рэалізацыі праектаў па навуковай апрацоўцы і захаванасці рукапісаў і рэдкіх кніг, у першую чаргу ў рамках праграмы "Радзівіліяна". Праект падрыхтаваны супрацоўнікамі бібліятэк у рамках ЮНЕСКА, а ход яго рэалізацыі плануеццаразгледзець у перыяд правядзення міжнароднай канферэнцыі "Кніжныя фонды Радзівілаў у Нясвіжы. Стан даследаванняў рэканструкцыі фондаў". У яе працы прымуць удзел намеснік дырэктара па навуковай рабоце і сувязям з грамадскасцю Л.Г. Кірухіна і загадчыца навукова-даследчага аддзела кнігазнаўства Г.У. Кірэева.
