15 мая, у Міжнародны дзень сям’і, Нацыянальную бібліятэку Беларусі наведалі члены Беларускай асацыяцыі шматдзетных бацькоў Першамайскага раёна г. Мінска.
Яны ўзялі ўдзел у экскурсіі-квесце “Шлях Вялікай Перамогі”, прымеркаванай да 80-годдзя вызвалення Рэспублікі Беларусь ад нямецка-фашысцкіх захопнікаў.
Экскурсія дала магчымасць сем’ям сумесна правесці вольны час, адпачыць ад паўсядзённых клопатаў, атрымаць уяўленне аб магчымасцях арганізацыі сямейнага адпачынку ў бібліятэцы, і, спадзяёмся, адчуць увагу і падтрымку з боку навакольных.
Падчас экскурсіі госці з дапамогай карт прайшлі маршрут па Нацыянальнай бібліятэцы Беларусі і, выкарыстоўваючы электронныя планшэты, выканалі заданні. Экскурсанты пашырылі веды аб знакавых асобах (А. Кіжаватаве, М. Гастэла і інш.) і важных гістарычных месцах, звязаных з вялікай перамогай (Брэсцкай крэпасці, Хатыні і інш.).
Напрыканцы гасцей чакаў сюрпрыз – яны наведалі аглядную пляцоўку, дзе зрабілі памятныя фота на святочнай фотазоне.
Запрашаем усіх жадаючых на экскурсіі ў Нацыянальную бібліятэку Беларусі.
Заяўкі прымаюцца з аўторка па суботу з 10.00 да 18.00 па тэлефонах: (8 017) 293 29 66, 293 28 53.
Матэрыял пададзены аддзелам экскурсійна-метадычнай работы.
