Прастора і кантэкст: сучасная сусветная архітэктура

З 11 лістапада па 4 снежня ў зале дакументаў па мастацтве (пам. 306) праходзіць тэматычная кніжна-ілюстрацыйная выстава “Прастора і кантэкст: сучасная сусветная архітэктура”.

Архітэктура ва ўсе часы цесна звязана з гісторыяй развіцця грамадства, якая адлюстроўваецца ў творах дойлідства. У розныя гістарычныя эпохі змяняюцца мастацкія ідэалы, уяўленні аб прыгажосці, што ўплывае на змену стылістычных пераваг. Мастацтва архітэктуры знаходзіцца ў бесперапынным развіцці: з удасканаленнем тэхналогій збудаванні становяцца ўсё больш наватарскімі, архітэктары прапануюць самыя нечаканыя рашэнні, ператвараючы сучаснае дойлідства ў буйнамаштабны дызайн.

Выстава знаёміць з аўтарскімі канцэпцыямі, якія адлюстроўваюць актуальныя тэндэнцыі і перспектывы развіцця сучаснай архітэктуры. Прадстаўлены кнігі па праектаванні і будаўніцтве, дызайне архітэктурнага асяроддзя і найноўшых канструктыўных сістэмах. Увазе наведвальнікаў прапанаваны вядомыя замежныя часопісы “AIT”, “Architektur.aktuell”, “Architectural design”, “Architectural Digest”, “Architectural Record”, “Domus”, “Der Baumeister”, “Проект Россия” і іншыя.

Асобны раздзел прысвечаны даследаванням па гісторыі развіцця сучаснай беларускай архітэктуры. Жывую цікавасць выкліча часопіс “Архитектура и строительство” – аўтарытэтнае выданне для прафесіяналаў у галіне архітэктуры, праектавання, дызайну інтэр’ераў, ландшафтнага дызайну, будаўніцтва. Кожны выпуск часопіса дае магчымасць чытачам быць максімальна ўцягнутымі ў асноўныя падзеі ў будаўнічым свеце, павысіць свой прафесійны ўзровень, даведацца аб разнастайнасці дасягненняў беларускага дойлідства.

Сучасны архітэктурны будынак – гэта маленькая мадэль адлюстравання свету. Матэрыялы, прадстаўленыя на выставе, шчодра ілюстраваны і паслужаць бясцэннай крыніцай інфармацыі і натхнення для архітэктараў, ландшафтных дызайнераў і даследчыкаў у галіне сучаснай архітэктуры.

Тэлефон для даведак: (8 017) 293 27 53.