23 красавіка адзначаецца юбілей Уладзіміра Міхайлавіча Конана (1934–2011), які плённа працаваў у розных сферах гуманітарных навук.
Нарадзіўся Уладзімір Конан у в. Вераскава Навагрудскага раёна Гродзенскай вобласці ў сялянскай сям’і. Вучыўся на гістарычным факультэце Беларускага дзяржаўнага ўніверсітэта (1952–1959). Працаваў настаўнікам у Стражоўскай школе на Вілейшчыне, каля двух гадоў быў яе дырэктарам.
Пасля была вучоба ў аспірантуры Інстытута філасофіі і права АН БССР. Кандыдацкую дысертацыю абараніў у 1965 г. і з наступнага года пачаў працаваць у гэтай навучальнай установе (за гады працы ў інстытуце прайшоў шлях да вядучага навуковага супрацоўніка). У 1982 г. абараніў у Маскве доктарскую дысертацыю на тэму “Становление и развитие эстетической мысли Белоруссии (Х в. – 1917 г.)”.
З 1991 па 2004 г. У.М. Конан з’яўляўся загадчыкам аддзела гісторыі і тэорыі культуры Нацыянальнага навукова-асветніцкага цэнтра імя Ф. Скарыны. Некалькі гадоў выконваў абавязкі эксперта Вышэйшай атэстацыйнай камісіі Рэспублікі Беларусь, з’яўляўся членам двух Саветаў па абароне дысертацый (пры Інстытуце філасофіі НАН Беларусі і Беларускім дзяржаўным універсітэце культуры і мастацтваў), быў навуковым кансультантам шэрага выдавецтваў і часопісаў.
Першы навуковы артыкул У.М. Конан надрукаваў у 1963 г. у часопісе “Весці АН БССР”. У 1968 г. выйшла першая манаграфія “Развіццё эстэтычнай думкі ў Беларусі (1917–1934 гг.)”. Затым з друку выходзілі яго кнігі “Демократическая эстетика Белоруссии (1905–1917 гг.)”, “От Ренессанса к классицизму: (становление эстетической мысли Белоруссии в XVI–XVIII вв.)”, “Проблемы искусства и эстетики в общественной мысли Белоруссии начала ХХ в.” і інш. Менавіта У.М. Конан упершыню распрацаваў праблемы гісторыі беларускай эстэтыкі, глыбока даследаваў беларускую мастацкую культуру за тысячу гадоў, з Х па ХХ стагоддзе.
|
|
Грунтоўнымі навуковымі працамі вучонага таксама з’яўляюцца “Адам Бабарэка: крытычна-біяграфічны нарыс”, “Боская і людская мудрасць: (Францішак Скарына: жыццё, творчасць, светапогляд”), “Святло паэзіі і цені жыцця: лірыка Максіма Багдановіча” і інш.
Работы вучонага вядомы не толькі ў нашай краіне, але і далёка за яе межамі. Акрамя таго Уладзімір Міхайлавіч – удумлівы літаратурны крытык і публіцыст. Шмат артыкулаў напісаў для агульных і галіновых беларускіх энцыклапедый.
З 1982 г. У.М. Конан – член Саюза пісьменнікаў БССР. У 1984 г. за ўдзел у напісанні цыкла калектыўных манаграфій па гісторыі філасофскай і грамадска-палітычнай думкі Беларусі, апублікаваных у 1973–1980 гг., узнагароджаны Дзяржаўнай прэміяй БССР. У 2009 г. выйшаў зборнік артыкулаў да 75-годдзя з дня нараджэння вучонага “Погляд у вечнасць”.
У апошнія гады жыцця ён захапіўся напісаннем фундаментальнага даследавання “Гісторыя эстэтычнай думкі Беларусі”. У 2010 г. выйшаў першы том, прысвечаны тэарэтычнай і мастацка-творчай эстэтыцы нашай краіны ад эпохі Сярэдневякоўя да пачатку ХХ стагоддзя.
Больш звестак аб выдатным доктары філасофскіх навук і яго працах можна знайсці, карыстаючыся рэсурсамі Нацыянальнай бібліятэкі: электронным каталогам, анлайн-энцыклапедыяй “Беларусь у асобах і падзеях”.
З 23 красавіка па 20 мая ў зале беларускай літаратуры (пам.205) праходзіць кніжная выстаўка “Погляд у вечнасць” да 90-годдзя з дня нараджэння Уладзіміра Конана.
Матэрыял падрыхтаваны навукова-даследчым аддзелам бібліяграфіі.
