У Дзяржаўным музей гісторыі беларускай літаратуры на выстаўцы “Беларускі друкар Спірыдон Собаль” экспануюцца старадрукі з фонду Нацыянальнай бібліятэкі Беларусі.
Урачыстае адкрыццё выстаўкі, прысвечанай выбітнаму дзеячу беларускай асветы Спірыдону Собалю, адбылося 10 красавіка. Праект падрыхтаваны сумесна з Нацыянальнай бібліятэкай Беларусі, Цэнтральнай навуковай бібліятэкай імя Я.Коласа НАН Беларусі, Нацыянальным мастацкім музеем Рэспублікі Беларусь і Музеем гісторыі Магілёва.
На ўрачыстасці з прывітальнымі словамі выступілі загадчык навукова-экспазіцыйнага аддзела Дзяржаўнага музея гісторыі беларускай літаратуры Вольга Гулева, намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша, дырэктар Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Іван Саверчанка, дырэктар Музея гісторыі Магілёва Аляксей Бацюкоў, навуковы супрацоўнік Цэнтральнай навуковай бібліятэкі імя Я. Коласа Нацыянальнай акадэміі навук Беларусі Паліна Скурко і іншыя.
Аляксандр Суша адзначыў, што таленавіты асветнік і кнігадрукар Спірыдон Собаль пакінуў нам багатую спадчыну – свае выданні, якія яшчэ пры жыцці выдаўца разышліся па ўсёй Усходняй Еўропе і сёння захоўваюцца ў кнігазборах многіх краін свету. Усюды яны ўспрымаюцца як вялікая каштоўнасць, як значнае дасягненне ў гісторыі ўсходнееўрапейскага кнігадрукавання. Паліграфічны і мастацкі ўзровень выданняў Спірыдона Собаля быў высокім, а некаторыя яго рашэнні выглядалі наватарскімі. Магілёўскае кнігадрукаванне, непасрэдна звязанае з яго дзейнасцю, аказала ўплыў на развіццё кніжных традыцый на ўкраінскіх і расійскіх землях.
Наведвальнікі выстаўкі маюць магчымасць пазнаёміцца з выданнямі XVII – пачатку XVIIІ cт. з друкарні Спірыдона Собаля ў Кіеве, Магілёўскага брацкага манастыра, Богаяўленскай друкарні Спірыдона Собаля ў Куцейне і іншым. З фонду Нацыянальнай бібліятэкі на выстаўцы экспануюцца шэсць старадрукаў.