6 снежня намеснік дырэктара Нацыянальнай бібліятэкі Беларусі па інфармацыйных рэсурсах Таццяна Кузьмініч наведала Нацыянальную бібліятэку Сербіі.
У рамках афіцыйнага візіту яна правяла прэзентацыю мерапрыемстваў, падрыхтаваных у Беларусі і за мяжой у азнаменаванне 500-годдзя беларускага і ўсходнеславянскага кнігадрукавання, і перадала ў дар Нацыянальнай бібліятэцы Сербіі факсімільнае выданне "Кніжная спадчына Францыска Скарыны".
Агульнанацыянальны праект па факсімільным перавыданні кніжнай спадчыны Францыска Скарыны ажыццяўляецца з 2013 года Нацыянальнай бібліятэкай Беларусі пры падтрымцы банка БелВЭБ. У аснову шматтомнага выдання пакладзены электронныя копіі кніг першадрукара, якія знаходзяцца ў бібліятэках і музеях Беларусі, Расіі, Украіны, Германіі і іншых краін.
Унікальная калекцыя дазволіць жыхарам Сербскай Рэспублікі пазнаёміцца з нашай краінай, яе гісторыяй і культурай.
Таццяна Кузьмініч запрасіла прадстаўнікоў Нацыянальнай бібліятэкі Сербіі прыняць удзел у міжнародным кангрэсе "500 гадоў беларускага кнігадрукавання" і выстаўцы "Францыск Скарына і яго эпоха" (верасень – кастрычнік 2017 года).
Візіт адбыўся пры падтрымцы нацыянальнай авіякампаніі Беларусі "Белавія".
