З 4 студзеня па 1 лютага ў зале беларускай літаратуры (пам. 205) праходзіць выстаўка “Вернасць роднаму слову, вернасць роднай зямлі”, прысвечаная 70-годдзю беларускага пісьменніка, публіцыста, радыёжурналіста і грамадскага дзеяча Навума Гальпяровіча.
Як і славуты Францыск Скарына, Навум Якаўлевіч Гальпяровіч – сын слаўнага “града Полацка”. І хоць даўно жыве і працуе ў Мінску, з Полацкам не парывае сувязі і сёння.
У трох раздзелах экспазіцыі “Веру, боль мой пакутны спатрэбіцца людзям”, “Пісьменнік і кніга – сінонімы”, “На шляху да сябе” шырока прадстаўлена літаратура аб жыцці і творчасці Навума Якаўлевіча.
Творчую дзейнасць будучы пісьменнік пачынаў супрацоўнікам полацкай аб’яднанай газеты “Сцяг камунізму”. Працу на радыёвузле наваполацкага вытворчага аб’яднання “Палімір” і ў гарадской газеце “Химик” спалучаў з завочнай вучобай на факультэце журналістыкі БДУ, а потым – у Віцебскім педагагічным інстытуце. Працаваў уласным карэспандэнтам Дзяржтэлерадыё, намеснікам галоўнага рэдактара часопіса “Вожык”, намеснікам старшыні Саюза беларускіх пісьменнікаў, галоўным дырэктарам замежнага вяшчання Беларускага радыё. З'яўляецца аўтарам розных тэле- і радыёпраектаў. На вершы Н. Гальпяровіча напісаны песні вядомымі беларускімі кампазітарамі Э. Зарыцкім, У. Буднікам, А. Елісеенкавым, В. Івановым і інш. Яго літаратурныя творы перакладаліся на розныя мовы свету.
Наведвальнікі выстаўкі маюць магчымасць пазнаёмяцца з кнігамі паэзіі Навума Гальпяровіча “Брама”, “Востраў душы”, “Струна”, “Святло ў акне”, “Голас і рэха”, “Гэта ўсё для цябе”, “Насцеж”, “Я ад дрэва твайго”, “У чаканні кахання”, з кнігай прозы “Шляхі і вяртанні” і інш. Цікавасць выклікаюць краязнаўчыя працы з серыі “Гарады і гістарычныя мясціны Беларусі”: “Полацк – бацька гарадоў беларускіх”, “Мінск – сталіца Беларусі”, “Гродна. На заходняй мяжы Айчыны”, “Віцебск – горад майстроў і мастакоў”, а таксама даведнікі “Приглашаем в Беларусь” і “Приглашаем в Минск”.
Дапаўняюць экспазіцыю шматлікія публікацыі пісьменніка ў калектыўных зборніках, літаратурна-крытычныя і публіцыстычныя артыкулы ў перыядычных выданнях.
Усяго выстаўка налічвае каля 120 выданняў.
Тэлефон для даведак: (8 017) 293 27 16.
