Сугучнасць слоў жывых

Да 100-годдзя з дня нараджэння беларускага мовазнаўца, журналіста Міхаіла Яўгенавіча Цікоцкага з 19 лютага па 30 сакавіка ў зале беларускай літаратуры (пам. 205) праходзіць выстаўка “Сугучнасць слоў жывых”.

Міхаіл Яўгенавіч Цікоцкі (1922–2012) – адзін з заснавальнікаў школы беларускай стылістыкі, доктар філалагічных навук, прафесар, заслужаны работнік адукацыі Беларусі, заслужаны работнік вышэйшай школы Беларусі, заслужаны журналіст Беларусі, удзельнік Вялікай Айчыннай вайны. Даследаваў пытанні стылістыкі беларускай мовы і стылістыкі газетных жанраў. У сваіх працах вучоны зрабіў першыя спробы стылістычнай характарыстыкі лексічных і фразеалагічных сродкаў беларускай мовы з пункту гледжання іх практычнага выкарыстання ў розных стылях і жанрах, распрацоўваў пытанні марфалагічнай і сінтаксічнай стылістыкі. Яго цікавілі не толькі агульнатэарэтычныя пытанні, але і функцыянальныя стылі мовы, а таксама іх класіфікацыя. У сферу інтарэсаў даследчыка ўваходзілі праблемы стылістыкі мастацкай літаратуры і эстэтыкі слова. М. Цікоцкі вывучаў мову літаратурных класікаў – Я. Коласа, Я. Купалы, К. Чорнага, М. Лужаніна і інш.

Навуковую і педагагічную работу вучоны сумяшчаў з грамадскай дзейнасцю. Як член Саюза журналістаў Беларусі прымаў удзел у рабоце яго секцый, выступаў з лекцыямі і дакладамі па праблемах культуры мовы.

У экспазіцыі прадстаўлены матэрыялы, якія адлюстроўваюць жыццё і плённую навуковую дзейнасць Міхася Яўгенавіча, – манаграфіі, вучэбныя дапаможнікі і падручнікі яго аўтарства, сярод якіх “Некаторыя выпадкі стылістычнага выкарыстання сінтаксічных сродкаў беларускай мовы”, “З гісторыі беларускай журналістыкі XIX стагоддзя”, “Практычная стылістыка беларускай мовы”, “Стылістыка публіцыстычных жанраў”, “Стылістыка тэксту”, “Урокі моўнага майстэрства” і інш.

Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.

Тэлефон для даведак: (8 017) 293 27 16.