VII Гарадзенскія чытанні былі прымеркаваны да 150-годдзя з пачатку выдання першай беларускамоўнай нелегальнай рэвалюцыйна-дэмакратычнай газеты “Мужыцкая праўда”.
Нязменным арганізатарам мерапрыемства з’яўляецца абласная навуковая бібліятэка імя Я. Карскага. Як і заўсёды, прапанаваная тэма выклікала шчырую зацікаўленасць прафесійных даследчыкаў – навукоўцаў, аматараў гісторыі роднага краю, студэнтаў.
Газета (ці, як яшчэ яе называлі ў тыя часы, улётка, заклік, брашура) “Мужыцкая праўда” выдавалася ў 1862–1863 гадах на тэрыторыі сучаснай Гродзеншчыны і характарызавалася вострай сацыяльнай прапагандысцка-агітацыйнай накіраванасцю. За час існавання выдання свет убачылі сем нумароў. Палымяныя прамовы, што тычыліся пытанняў зямлі і волі, палітычнай і сацыяльна-эканамічнай няроўнасці, рэлігіі, друкаваліся лацінкай і падпісваліся псеўданімам “Яська – гаспадар з-пад Вільні”.
Удзельнікі сёмых Гарадзенскіх чытанняў звярнулі ўвагу на месца газеты “Мужыцкая праўда” ў кантэксце беларускай культуры, разглядалі яе як узор мастацкай публіцыстыкі, разважалі над праблемамі, якія тагачаснымі аўтарамі ўзнімаліся на старонках выдання. Прагучалі даклады пра развіццё перыядычнага друку Гродзеншчыны, яго здабыткі, праблемы, перспектывы.
Пад час чытанняў дзейнічаў адкрыты прагляд “«Мужыцкая праўда» – першая дэмакратычная газета на роднай мове”.
Крыніца: газета “Рэспубліка”
