Фестываль інтэлектуальнай кнігі «Прадмова» сёлета адбудзецца другі раз. Наведаць майстар-класы, прэзентацыі новых выданняў ды выступы пісьменнікаў можна будзе з 4 па 7 красавіка ў мінскай прасторы ОК16. Але не толькі.
– Сёлета фестывальная пляцоўка не абмяжоўваецца толькі Мінскам, – кажа адзін з каардынатараў фестывалю Андрэй Хадановіч.
Увесь сакавік будзе прысвечаны фестывальным мерапрыемствам «Прадмовы» у рэгіёнах. Імпрэзы пройдуць у чатырох, калі атрымаецца – у пяці гарадах. Пачнём ці завершым сімвалічна з «калыскі нашага кнігадрукавання» – Полацка. Таксама ў Гомелі, Гародні і Берасці адбудуцца сустрэчы аўтараў з чытачамі. Такім чынам мінскі фестываль апынецца фінішнай кропкай месяца з паловай імпрэз, звязаных з «Прадмовай».
Па задуме арганізатараў на імпрэзах у рэгіёнах разам з мясцовымі творцамі выступяць намінанты мінулагодняга шорт-ліста прэміі Гедройца.
– Мы вельмі зацікаўленыя, каб мясцовыя аўтары ды арганізатары дадалі ў фестываль штосьці сваё. А таксама, каб у мясцовых аўтараў была магчымасць прадставіць сваю творчасць, у тым ліку і праз розныя формы, калабарацыі з музыкамі, мастакамі ды акцёрамі, – адзначае каардынатарка фестываля Дар’я Бялькевіч.
Да ўдзелу ў фестывальных імпрэзах у Мінску далучацца вядомыя беларускія літаратары, гісторыкі, крытыкі ды мысляры.
Гэтым годам арганізатары вядуць перамовы з шэрагам замежных гасцей. Сярод іх фінская пісьменніка Софі Оксанен, знакамітая сваім раманам «Сталінскія каровы», расійская паэтка Вера Паўлава, пісьменнік ды літаратуразнаўца Віктар Ярафееў, літоўскі паэт і інтэлектуал Томас Венцлова. А таксама ўкраінскі паэт і празаік Сяргей Жадан, падчас фестываля плануецца прэзентацыя перакладу на беларускую мову яго кнігі прозы «Інтэрнат».
Пляцоўка ОК16 будзе падзеленая на некалькі зон. Такі чынам можна будзе спалучыць і правядзенне шматлікіх майстар-класаў, дыскусій, праграму для самых маленькіх наведвальнікаў ды выступы творцаў, а таксама працу кірмашу са стэндамі выдавецтваў.
Асобнай імпрэзай, якая пройдзе ноччу з пятніцы на суботу 5 на 6 красавіка, арганізатары плануюць правесці адмысловую «Ноч кнігі», дзе спалучыцца літаратурная, музычная ды тэатральная праграма.
– Да фестывалю плануем стварыць тэматычную літаратурную барную карту. Мне здаецца, наведвальнікам цікава было б паспрабаваць кактэйль «Акудовіч» ці «Бахарэвіч», – распавядае Андрэй Хадановіч.
Адна з важных мэт фэсту «Прадмова» – стварыць пляцоўку для камунікацыі паміж усімі ўдзельнікамі літаратурнага працэсу. У мінулым годзе праграма фэсту ўключала больш як 70 імпрэз.
Арганізатары заклікаюць творцаў, выдаўцоў ды пісьменнікаў у Мінску ды рэгіёнах далучацца да праграмы фестывальных імпрэз. Заяўкі на ўдзел можна дасылаць на пошту pradmova@gmail.com
Аўтар публікацыі: Алена Вільтоўская.
Крыніца: радыё «Рацыя»