Для карыстальнікаў бібліятэкі, арганізацый – партнёраў па віртуальнай чытальнай зале і партнёраў па тэставым доступе адкрыты тэставы доступ да чатырох калекцый базы даных “HeinOnline” кампаніі “William S. Hein & Co.” – аднаго з найбуйнейшых выдавецтваў перыядычных выданняў па юрыдычнай тэматыцы.
У калекцыі “HeinOnline Legal Classics” прадстаўлена больш за 10 тысяч работ выдатных вучоных, практыкаў і даследчыкаў гісторыі права. У калекцыю ўвайшлі не толькі класічныя працы, але і рэдкія работы, арыгіналы якіх можна знайсці толькі ў некалькіх бібліятэках свету. Некаторыя выданні адносяцца да XVI стагоддзя.
Калекцыя “HeinOnline Federal Register Library” – электронная версія юрыдычнай газеты “The Federal Register”, урадавага выдання, якое публікуе тэксты ўказаў і заяў прэзідэнта ЗША, а таксама ўрадавыя пастановы і паведамленні. Электронны інфармацыйны рэсурс папаўняецца штодня.
Калекцыя “HeinOnline Сode of Federal Regulations” уяўляе сабой звод нарматыўных дакументаў у сферы банкаўскай справы, камерцыйнай дзейнасці, аховы здароўя, фармакалогіі, харчовай прамысловасці, транспарту, бяспекі і абароны.
У калекцыі “HeinOnline World Constitution Illustrated” прадстаўлены поўныя тэксты дзеючых канстытуцый на мове арыгіналу і ў перакладзе на англійскую мову, а таксама дакументы па гісторыі палітычнага развіцця краін, уключаючы перыядычныя выданні, кнігі і іншыя работы, спасылкі на навуковыя артыкулы і электронныя рэсурсы. Мова дакументаў – англійская.
Доступ адкрыты да 2 мая 2018 года.