24 кастрычніка ў бібліятэцы прайшоў рэспубліканскі навукова-практычны семінар “Духоўна-маральнае развіццё навучэнцаў сучаснай адукацыйнай прасторы на праваслаўных традыцыях і каштоўнасцях беларускага народа з улікам сацыякультурнага кластара”.
Мэта мерапрыемства – знаёмства педагагічных работнікаў з тэарэтычнымі асновамі духоўна-маральнага выхавання, інавацыйнымі сродкамі бібліятэчнай работы і комплексам сучаснай літаратуры, якая ўзбагачае духоўны свет чалавека.
У семінары ўзялі ўдзел прадстаўнікі духавенства і Міністэрства інфармацыі Рэспублікі Беларусь, а таксама кіраўнікі ўстаноў адукацыі з усіх абласцей краіны, якія рэалізуюць інавацыйныя праекты па тэматыцы семінара. Удзельнікі вызначылі асноўныя напрамкі работы з навучэнцамі, абмяняліся вопытам работы і абмеркавалі праблемныя пытанні за круглым сталом.
Намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша расказаў аб праекце факсімільнага ўзнаўлення першага “Буквара” 1618 года і яго ролі ў фарміраванні духоўна-асветніцкай традыцыі Беларусі. Загадчыца аддзела экскурсійна-метадычнай работы Людміла Камароўская на прыкладзе экскурсійнай дзейнасці паказала, як можна далучыцца да культурных каштоўнасцей беларускага народа. Загадчык сектара навукова-праектнай работы навукова-даследчага аддзела кнігазнаўства Таццяна Сапега ў сваім дакладзе зрабіла акцэнт на музейную педагогіку як на інавацыйную форму адукацыйнага працэсу.
Пасля актыўнай работы для ўдзельнікаў семінара была праведзена аглядная экскурсія па бібліятэцы, падчас якой госці пазнаёміліся з архітэктурнымі асаблівасцямі будынка, наведалі чытальныя залы і галерэйны комплекс, падняліся на аглядную пляцоўку.
