23 красавікa ў бібліятэцы прайшла прэзентацыя Збору твораў у 5-ці тамах вядомага беларускага філосафа і культуролага М.І. Крукоўскага.
Навуковыя даследаванні кандыдата філалагічных навук, доктара філасофскіх навук, прафесара Мікалая Ігнатавіча Крукоўскага (1923–2013) ахопліваюць актуальныя праблемы культурнага жыцця краіны і станаўлення нацыянальнай свядомасці.
Мікалай Ігнатавіч – аўтар каля 150 артыкулаў на навуковыя і грамадскія тэмы і шэрагу манаграфій: "Логика красоты" (1965), "Основные эстетические категории: Опыт систематизации" (1974), "Кибернетика и законы красоты" (1977), "Homo pulcher – Человек красивый" (1983), "Філасофія культуры: Уводзіны ў тэарэтычную культуралогію" (2000), "Бляск і трагедыя ідэалу" (2004) і інш.
Працы вучонага маюць шырокі абсяг, ахопліваючы філасофію, лінгвістыку, эстэтыку і культуралогію, і адрозніваюцца багаццем зместу, думак і грунтоўных высноў.
У мерапрыемстве ўзялі ўдзел вучні і былыя калегі філосафа – намеснік дырэктара Нацыянальнай бібліятэкі Беларусі, кандыдат культуралогіі Аляксандр Суша; дырэктар Інстытута сацыяльна-гуманітарнай адукацыі УА “Беларускі дзяржаўны эканамічны ўніверсітэт”, доктар філасофскіх навук Аляксандр Лапцёнак; кандыдат фізіка-матэматычных навук, прафесар УА “БІП-Інстытут правазнаўства” Анатоль Астапенка; доктар філасофскіх навук, прафесар Вадзім Салееў; кандыдат філалагічных навук, прафесар Беларускага дзяржаўнага ўніверсітэта культуры і мастацтва Аляксей Рагуля; кандыдат педагагічных навук, гісторык і пісьменнік Анатоль Тарас. Яркімі ўспамінамі пра бацьку падзялілася яго дачка – музыкант Вольга Крукоўская.
Падчас прэзентацыі адбыўся прагляд фрагмента дакументальнага фільма, прысвечанага Мікалаю Крукоўскаму.
У канцы сустрэчы камплекты кніг М.І. Крукоўскага былі перададзены вядучым бібліятэкам і ўстановам Мінска, у далейшым Збор твораў філосафа папоўніць фонды буйных бібліятэк краіны.
Тэлефоны для даведак: (8 017) 266 37 37, 293 29 80.
Е-mail: pr@nlb.by