23 сакавіка ў Нацыянальнай бібліятэцы Беларусі ў рамках святкавання Дня Незалежнасці Грэчаскай Рэспублікі адбылося ўрачыстае мерапрыемства "Пад небам Грэцыі свяшчэннай…".
Арганізатарамі мерапрыемства выступілі Беларускае грамадскае аб’яднанне грэкаў "Пелапанес", Пасольства Грэчаскай Рэспублікі ў Расійскай Федэрацыі, Міністэрства культуры Рэспублікі Беларусь і Нацыянальная бібліятэка Беларусі.
У рамках мерапрыемства ладзілася прэзентацыя кніжна-ілюстрацыйнай выстаўкі, на якой была прадстаўлена літаратура па гісторыі, сацыяльным і культурным жыцці Грэцыі.
У мабільнай галерэі размясцілася выстаўка грэчаскага мастака Паўла Дзімітрыядзі, а таксама экспазіцыя фотаматэрыялаў, у якую ўвайшлі партрэты герояў Нацыянальна-вызваленчага руху Грэцыі (1821–1833 гг.).
У мерапрыемстве ўзялі ўдзел старшыня Савета Беларускага грамадскага аб’яднання грэкаў "Пелапанес" Рафаэль Дальянаў, намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша, галоўны спецыяліст Міністэрства культуры Рэспублікі Беларусь Эдуард Швайко, прадстаўнікі грэчаскай дыяспары і творчай інтэлігенцыі.
Для гасцей вечара была прадстаўлена канцэртная праграма, у якой узялі ўдзел лаўрэаты і ўдзельнікі рэспубліканскіх фестываляў і конкурсаў Артур Міхайлаў, Ігар Грыцук, Марк Войтка, Ксенія Чалопула, Паліна Міхайлава, а таксама харэаграфічныя ансамблі "Белыя крылы" (пад кіраўніцтвам заслужанага дзеяча культуры Рэспублікі Польшча Віктара Барановіча), "Скавыш" (пад кіраўніцтвам Кацярыны Тапоцкай), "Алкестыда" (пад кіраўніцтвам Данілы Міхаілідзі).