Сёння ў 19:00 Нацыянальная бібліятэка Беларусі расчыніла дзверы для ўсіх жадаючых далучыцца да штогадовай культурнай акцыі ў падтрымку кнігі і чытання – Бібліяночы-2018!
У гэты вечар з 19:00 да 23:00 госці свята здзейсняць сапраўднае падарожжа ў часе, пабываюць у розных эпохах і адчуюць сябе часткай іншага пакалення.
Такім чынам, часавы партал адчынены! Галоўны чараўнік Бібліяночы – Майстар гадзіннікаў ужо запусціў стрэлкі механізма і перанёс прысутных у паралелі часу. Правадніком паміж эпохамі стала, вядома, яе вялікасць Кніга! Бо менавіта яна захоўвае гісторыю чалавецтва і веды, назапашаныя ім на працягу тысячагоддзяў.
Гасцей вечара павітала першы намеснік дырэктара Нацыянальнай бібліятэкі Беларусі Алена Далгаполава, пажадаўшы ўсім цудоўнага настрою і цікавага падарожжа.
Асаблівы тэмп “бібліявечарынцы” задалі ўдзельнікі акадэміі мюзікла “Рэвю”, падарыўшы гледачам яркі нумар “Пакаленне NEXT”.
Часавы партал будзе адкрыты роўна чатыры гадзіны. Так што вы яшчэ паспяваеце далучыцца да нас і адчуць сябе па-за часам. Шчыра чакаем! Ваша NLB.