31 ліпеня ў бібліятэцы адбылося адкрыццё найбуйнейшай выстаўкі жывапісу і графікі Кітайскай Народнай Рэспублікі.
Работы, прадстаўленыя на ёй, – гэта сапраўды “залаты” фонд сучаснага мастацтва Кітая. Нягледзячы на невялікую колькасць работ, экспануемых у Нацыянальнай бібліятэцы Беларусі, формы выражэння і іх тэматыка вельмі шырокія. У карцінах адлюстравана лірыка ваеннага жыцця, замалёўкі народнага побыту; напружанасць жыцця ў вялікіх гарадах і бязмежныя пейзажы з горамі, рэкамі, кветкамі і птушкамі ў прыродзе. Асабліва выразна адлюстроўваецца панарама сучаснага Кітая.
Мастацкія работы для перасоўнай выстаўкі выкананы ў розных тэхніках і адносяцца да розных стыляў. Гэта гохуа (кітайскі нацыянальны жывапіс) і алейны жывапіс, гравюра і акварэль, коміксы і інш.
У адкрыцці экспазіцыі прынялі ўдзел першы намеснік дырэктара Нацыянальнай бібліятэкі Беларусі Алена Далгаполава, міністр культуры Рэспублікі Беларусь Барыс Святлоў, Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Спадар Цуй Цімін, дэпутат Народнага палітычнага кансультатыўнага савета Кітая спадар У Чанцзян, старшыня Канфедэрацыі творчых саюзаў Беларусі і генеральны дырэктар Нацыянальнага мастацкага музея Рэспублікі Беларусь Уладзімір Пракапцоў.
Выстаўка жывапісу і графікі Кітайскай Народнай Рэспублікі адбылася ў рамках візіту ў Рэспубліку Беларусь дэлегацыі Асацыяцыі культуры і мастацтва КНР, на чале з першым намеснікам старшыні Асацыяцыі спадарыняй Чжаа Шы.
Экспазіцыя будзе дэманстравацца да 10 жніўня 2015 года ў галерэі “Ракурс” (2-гі паверх) .
Тэлефон для даведак: (8 017) 293 27 56.
E-mail: pr@nlb.by
 |
 |
 |
 |
 |
 |
 |
 |
 |
