З 30 красавіка па 1 чэрвеня ў зале нотных і аўдыядакументаў (пам. 305) праходзіць выстаўка “Ён песні аддаў усё спаўна”, прысвечаная 100-годдзю з дня нараджэння рускага кампазітара Марка Фрадкіна.
Народны артыст СССР, лаўрэат Дзяржаўнай прэміі СССР Марк Рыгоравіч Фрадкін (1914–1990) займае ганаровае месца ў шэрагу карыфеяў песеннага мастацтва.
Яго песням уласцівыя шматграннасць тэматыкі, грамадзянскасць, лірызм, багацце рытмікі, апора на народную песенную творчасць. Паэтычныя творы кампазітара блізкія сэрцам слухачоў, адказваюць іх патаемным пачуццям і сталі народнымі ў самім высокім сэнсе гэтага слова.
Ужо першыя яго сачыненні (“Песня о Днепре”, “Случайный вальс”, “Брянская улица”, “Песня о волжском богатыре”) прынеслі кампазітару шырокую вядомасць. Яны гучалі на дарогах вайны і былі любимы мільёнамі людзей.
У пасляваенныя гады М. Фрадкін стварыў не менш папулярныя творы: “Берёзы”, “Мы жили по соседству”, “За фабричной заставой”, “Комсомольцы-добровольцы”, “А годы летят”, “Прощайте, голуби” і сапраўдны песенны шэдэўр – “Течёт река Волга”.
Далей былі новыя значныя работы кампазітара – “За того парня”, “Там, за облаками”, “Увезу тебя я в тундру” і інш.
Марк Фрадкін – аўтар музыкі да кіна- і тэлефільмаў: “Дабравольцы”, “Простая гісторыя”, “Аднойчы праз 20 гадоў”, “Бацькі і дзяды” і інш. Ён таксама напісаў музыку да шэрагу спектакляў драматычных тэатраў.
Асноўную частку экспазіцыі складаюць нотныя выданні і аўдыядакументы з фондаў Нацыянальнай бібліятэкі, якія прадстаўляюць творчасць кампазітара. Наведвальнікі маюць магчымасць праслухаць творы М. Фрадкіна ў выкананні Л. Зыкінай, Л. Уцёсава, М. Бернеса, І. Кабзона, Д. Хварастоўскага, Л. Лешчанкі, А. Герман, ансамбляў “Самоцветы”, “Пламя” і інш.
Сярод экспанатаў выстаўкі – кніга М. Фрадкіна “Моя биография” (1974), манаграфія А. Курцмана “Марк Фрадкин” (1991), даведачныя выданні, а таксама шматлікія публікацыі з перыядычных выданняў, прысвечаныя жыццю і творчасці кампазітара.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
