З 17 снежня па 19 студзеня ў зале беларускай літаратуры (пам. 205) праходзіць выстаўка “Настаўнік. Воін. Пісьменнік”, прысвечаная 100-годдзю з дня нараджэння беларускага пісьменніка Аляксея Мікалаевіча Кулакоўскага (1913–1986).
Для творчасці заслужанага дзеяча культуры Беларусі (1974), лаўрэата Дзяржаўнай прэміі Беларусі (1986) А. Кулакоўскага характэрна неадрыўная сувязь з жыццём, канкрэтнымі падзеямі, мясцінамі, фактамі – невыпадкова І. Шамякін ахарактарызаваў яго як бытапісца. Самымі значнымі ў творчай біяграфіі пісьменніка сталі раманы дылогіі “Расстаёмся ненадоўга”, “Сустрэча на ростанях”, у якіх раскрыўся эпічны талент пісьменніка, а таксама аповесць “Нявестка”, якая стала самым мастацка дасканалым творам аўтара. Па матывах аповесці А. Макаёнак напісаў сцэнарый да мастацкага фільма “Шчасце трэба берагчы”, які быў пастаўлены ў 1958 г.
Галоўнай тэмай творчасці А. Кулакоўскага ў пасляваенныя дзесяцігоддзі стала тэма вайны, удзельнікам якой быў сам аўтар. Пісьменнік стаў адным з першых, хто раскрыў яе будзённасць і непаказны гераізм радавых салдат. Дылогія “Расстаёмся ненадоўга” і “Сустрэча на ростанях”, раман “Сцежкі зведаныя і нязведаныя”, аповесці “Белы сокал”, “Да ўсходу сонца”, “Маршрут да Клічава”, “Твой шлях перад табою”, “Хлебарэз”, шматлікія апавяданні сталі творчым укладам пісьменніка ў мастацкі летапіс Вялікай Айчыннай вайны, як і літаратурны запіс успамінаў аднаго з арганізатараў і кіраўнікоў партызанскага руху на Беларусі ў Вялікую Айчынную вайну, Героя Савецкага Саюза (1942) В. Казлова “Людзі асобага складу”.
Побач з ваеннай тэматыкай увагу пісьменніка прыцягвала рэальнае жыццё сучаснікаў, аб якім ён проста і шчыра расказаў у аповесцях “Дабрасельцы”, зборніках “Новыя сустрэчы”, “Хораша ўзыходзіць сонца”, “Незабыўнае рэха” і інш.
Пісаў А. Кулакоўскі і для дзяцей, якім адрасаваў апавяданні і аповесці.
Сучаснаму чытачу творы пісьменніка цікавы жыццёвай праўдай, павагай і любоўю да простага чалавека, увагай да яго ўнутранага стану, які ён умела раскрываў, ствараючы выразныя псіхалагічныя партрэты сваіх герояў.
На выстаўцы прадстаўлены Збор твораў, “Выбраныя творы”, зборнікі і асобныя выданні аповесцей і апавяданняў, першыя публікацыі аўтара ў перыядычных выданнях, асобныя нумары часопіса “Маладосць”, галоўным рэдактарам якога ён быў у 1953–1958 гг., калектыўныя зборнікі, у якія ўвайшлі творы пісьменніка. Некаторыя з іх былі выдадзены ў Празе, Лодзі, Сафіі.
На паліцы – беларускамоўныя выданні раманаў Р. Файзі “Яго вялікасць Чалавек” і Ш. Рашыдава “Мацней за буру” (у суаўтарстве з П. Кавалёвым), якія знаёмяць з А. Кулакоўскім як перакладчыкам.
Шырокае адлюстраванне ў экспазіцыі знайшлі матэрыялы пра творчасць Аляксея Мікалаевіча, кожны яго новы твор прыцягваў увагу крытыкаў, літаратуразнаўцаў, таварышаў па пяру: І. Шамякіна, І. Мележа, М. Лынькова, А. Адамовіча, В. Жураўлёва, П. Дзюбайлу і інш. Творчасць пісьменніка ў свой час стала прадметам дысертацыйнага даследавання С. Гусака, вынікам якога стаў крытыка-біяграфічны нарыс “Аляксей Кулакоўскі” (1967). Побач з артыкуламі, водгукамі, літаратуразнаўчымі матэрыяламі на выстаўцы экспануюцца ўспаміны пра А. Кулакоўскага.
Выстаўка ілюстравана фотаздымкамі і налічвае звыш за 100 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
