Рэпертуар персанальных краязнаўчых рэсурсаў арганізацый – партнёраў Нацыянальнай бібліятэкі Беларусі папоўніўся віртуальным праектам “Жарэс Алфёраў: чалавек-легенда”.
Рэсурс падрыхтаваны супрацоўнікамі Віцебскай абласной бібліятэкі імя У.І. Леніна да 90-годдзя з дня нараджэння вучонага-фізіка, лаўрэата Нобелеўскай прэміі Жарэса Іванавіча Алфёрава, навуковыя адкрыцці якога сталі асновай для стварэння сучасных электронных прылад, праклаўшы дарогу ў эру сучасных лічбавых тэхналогій.
Імкнучыся шматгранна раскрыць асобу сусветна вядомага вучонага, стваральнікі праекта прадставілі фактаграфічную і бібліяграфічную інфармацыю, фота- і відэаматэрыялы, інтэрнэт-рэсурсы пра яго жыццё, навуковую і грамадскую дзейнасць. Асаблівая ўвага нададзена сувязям Ж.І. Алфёрава з Беларуссю, у тым ліку з яго малой радзімай – Віцебшчынай.
Рэсурс даступны з віртуальнай чытальнай залы і раздзелаў вэб-навігатара “Беларусь у інфармацыйнай прасторы” (“Рэсурсы бібліятэк” – і “Год малой радзімы”).
У 2006 годзе Жарэс Алфёраў, ганаровы грамадзянін Мінска, Віцебска і Чашніцкага раёна Віцебскай вобласці, ганараваны ўзнагародамі Рэспублікі Беларусь, наведаў Нацыянальную бібліятэку Беларусі. Яго працы прадстаўлены ў фондах галоўнай бібліятэкі краіны.
Матэрыял прадастаўлены аддзелам карпаратыўнага ўзаемадзеяння.
