З 21 сакавіка па 7 красавіка 2005 г. у аддзеле беларускай літаратуры Нацыянальнай бібліятэкі экспануецца выстаўка, прысвечаная 70-годдзю з дня нараджэння беларускага пісьменніка Івана Аляксандравіча Кірэйчыка.
Экспазіцыю складуць зборнікі лірыкі і прозы, публікацыі з перыядычных выданняў, матэрыял аб жыцці і творчасці пісьменніка.
Пісьменнік Іван Кірэйчык вядомы чытачу як аўтар вершаў, апавяданняў і нарысаў.
Пра наш трывожны і няпросты час ён пісаў грунтоўна, з добрым веданнем жыцця. Яго творы прасякнуты публіцыстычным грамадзянскім пафасам, шчырасцю пачуццяў, спагадай і чалавекалюбствам.
Пачаўшы літаратурную дзейнасць з паэзіі, друкаваўся ў газетах і часопісах. Першыя вершы Івана Кірэйчыка ўвайшлі ў калектыўны зборнік паэтаў-балтыйцаў "Песня, рождённая морем"(1962), выдадзены ў Калінінградзе.
Потым выйшлі зборнікі паэзіі "Аснова" (1977), "З маіх крыніц" (1994).
Цікавыя па змесце, жывыя па форме нарысы і апавяданні пісьменніка склалі кнігі "Багацце душы - людзям" (1966), "Пялёсткавы бераг" (1969), "Каласам хіліцца долу" (1969), "Калінавая квецень" (1984).
Многія празаічныя творы І. Кірэйчыка ўвайшлі ў калектыўныя зборнікі "Вернутае шчасце" (1968), "Люблю будзённы дзень" (1976).
У літаратурным запісе Івана Аляксандравіча выйшлі кнігі партызанскіх запісак Р. Лазабеева "Лясныя пабрацімы" (1972), М. Качана "Апалёны ранак" (1994).
