27 красавіка ў Нацыянальнай бібліятэкі Беларусі адбудзецца выстаўка, прысвечаная 60-годдзю Вялікай Перамогі. На выстаўцы будуць прадстаўлены рэпрадукцыі жывапісу, скульптурных партрэтаў герояў вайны, календары, камплекты паштовак з выявамі мемарыяльных комплексаў і помнікаў баявой славы Беларусі.
Мінула 60 гадоў з дня Вялікай Перамогі над нямецка-фашысцкімі захопнікамі. Аднак ваенная тэматыка застаецца актуальнай і сучаснай нягледзячы на тое, што прайшло шмат часу.
Наша краіна першай прыняла на сябе ўдар гітлераўцаў. На абарону Радзімы паўсталі жыхары Беларусі, у тым ліку і беларускія мастакі.
Адны з іх - Г. Бржазоўскі, М. Гурло, В. Грамыка, С. Раманаў і іншыя - удзельнічалі ў партызанскай барацьбе, другія - М. Савіцкі, Я. Зайцаў, А. Бембель, А. Заспіцкі - змагаліся ў радах Савецкай Арміі.
Гэтыя падзеі пакінулі незабыўны след у асабістым жыцці мастакоў і знайшлі адлюстраванне ў іх творчасці.
У ваенны час зброяй М. Гуціева ("Вяртанне з аперацыі", 1942), У. Сухаверхава ("У партызанскай друкарні", 1943), А. Бембеля, З. Азгура (партрэты патрыётаў) было мастацтва, якое праслаўляла гераізм і маральную стойкасць людзей у гады цяжкіх выпрабаванняў.
Дзякуючы намаганням беларускіх архітэктараў і скульптараў на тэрыторыі Беларусі з'явілася шмат мемарыяльных комплексаў і помнікаў баявой славы: "Хатынь" (1969), "Брэсцкая крэпасць-герой" (1971), помнік Маці-патрыётцы (1975) і інш.
Ідуць гады… Новых твораў, якія праслаўляюць подзвіг народа, становіцца болей: "Вярнуліся" (1985, мастак М. Селяшчук), "Партызанскі хлеб" (1985, скульптар А. Бацвінёнак).