З 2 па 17 мая 2005 г. у аддзеле беларускай літаратуры Нацыянальнай бібліятэкі Беларусі праводзіцца выстаўка, прысвечаная 75-годдзю беларускага драматурга, пісьменніка, публіцыста, заслужанага работніка культуры Беларусі, кандыдата гістарычных навук Алеся Петрашкевіча.
Экспазіцыю складаюць асобныя выданні і зборнікі твораў аўтара, сцэнарыі мастацкіх фільмаў, падборка матэрыялаў з перыядычнага друку.
Аматарам літаратуры добра вядома творчасць Алеся Петрашкевіча, аўтара шматлікіх драматургічных твораў, апавяданняў, нарысаў, фельетонаў, памфлетаў.
Драматургія - гэта тая ніва на якой дасягнуты творчыя вяршыні пісьменніка. Алесь Петрашкевіч напісаў больш за трыццаць п'ес. Першая камедыя - "Адкуль грэх?"(паст. Бел. тэатрам імя Я.Купалы, 1969). Камедыя "Укралі кодэкс" (паст. Гомельскім абл. т-рам, 1976), "Злыдзень" (паст. 1973), "Ка-та-стро-фа" (Куды ноч, туды сон", паст. 1987, абедзве Магілёўскім абл. т-рам драмы і камедыі), драмы "Трывога" (паст. Бел т-рам імя Я. Коласа,1974), "Соль" (паст. Дзярж. рус. драм. т-рам, 1981), "У спадчыну - жыццё" (паст. Бел. рэсп. т-рам юнага гледача, 1985), "Дагарэла свечачка..." ( паст. 1997), гістарычныя п'есы "Напісанае застаецца" (паст. 1979), абедзве т-рам імя Я.Купалы), "Русь Кіеўская" паст. Гомельскім абл. т-рам, 1983), "Прарок для Айчыны" (тэлеспектакль, 1995) і іншыя.
Гістарычныя п'есы Алеся Петрашкевіча склалі зборнікі "Воля на крыжы" (2000), "Здрапежаная зямля" (2003).
П'есам драматурга ўласцівы канцэптуальнасць, сцэнічнасць, дынамізм, вострая інтрыга, публіцыстычная страстнасць, дакладнасць моўнай характарыстыкі вобразаў.
Алесь Петрашкевіч - аўтар сцэнарыяў мастацкіх і дакументальных фільмаў, лібрэта оперы "Новая зямля" паводле аднайменнай паэмы Я. Коласа (муз. Ю. Семянякі, паст. Дзярж. т-рам оперы і балета Беларусі,1982).
Аб адной з граней таленту пісьменніка - публіцыстыцы , пазначанай актыўнай грамадскай пазіцыяй, сведчаць публікацыі, асабліва артыкулы перыядычнага друку.
Алесь Петрашкевіч - лаўрэат Дзяржаўнай прэміі Беларусі (1976; за ўдзел у выданні Беларускай Савецкай Энцыклапедыі).