З 24 снежня па 31 снежня ў аддзеле беларускай літаратуры Нацыянальнай бібліятэкі Беларусі адбудзецца выстаўка, прысвечаная 100 - годдзю з дня нараджэння беларускага паэта, крытыка, перакладчыка Алеся Дудара.
Алесь Дудар быў каларытнай постаццю і носьбітам авангардных тэндэнцый у беларускім літаратурным жыцці 1920-х гадоў. Бліскуча адораны як паэт, таленавіты і востры як крытык, Алесь Дудар быў да таго ж актыўнай дзейснай асобай, адным з заснавальнікаў літаратурнага аб'яднання "Маладняк".
Падтрымліваючы наватарскія ўстаноўкі "Маладняка", А. Дудар у 1925 годзе выдаў дзве кнігі вершаў: "Беларусь бунтарская" і "Сонечнымі сцежкамі". Яны былі высока ацэненыя тагачаснай маладнякоўскай крытыкай як прыклад творчасці, дзе падаецца вобраз новай Беларусі.
А. Дудар - аўтар яшчэ двух паэтычных зборнікаў: "І залацісцей, і сталёвей" (1926), "Вежа" (1928); паэм "Шанхайскі шоўк" (1925), "Вайна за мір" (1932), "Слуцак" (1934).
У жанры прозы А.Дударам створаны зборнік апавяданняў "Марсельеза" і раман "Ваўчаняты" (у сааўтарстве з А.Александровічам і А. Вольным).
Пад псеўданімам Тодар Глыбоцкі паэт друкаваўся як крытык, пераважна па пытаннях драматургіі і тэатральнага мастацтва, выдаў зборнік артыкулаў "Пра нашы літаратурныя справы" (1928).
У 1928 годзе за ненадрукаваны верш "Пасеклі наш край папалам" паэт атрымаў першае "мяккае" пакаранне - высылка на 3 гады ў Смаленск. У 1936 годзе рэпрэсіраваны. Расстраляны. Рэабілітаваны ў 1957 годзе.
За сваё кароткае жыццё Алесь Дудар паспеў зрабіць нямала. Гэта дар неспакойнага сэрца нам - яго нашчадкам.
На выстаўцы прадстаўлены: паэтычныя зборнікі А. Дудара, выбраныя творы, асобныя выданні, кнігі перакладаў аўтара, матэрыялы аб жыцці і творчасці паэта.