![Выстаўка "Каб жыла культура продкаў"](/upload/iblock/f25/f2525aa4b89be234e80f18a6193e6751.jpg "Выстаўка "Каб жыла культура продкаў"")
Нацыянальная бібліятэка Беларусі запрашае наведаць тэматычную кніжную выстаўку "Каб жыла культура продкаў. Народныя святы, абрады, традыцыі".
Фальклор займаў і займае спецыфічнае месца ў беларускай нацыянальнай культуры, выконваючы шэраг важнейшых функцый, перш за ўсё эстэтычную, выхаваўчую, пазнавальную, адыгрываў важную ролю ў захаванні пераемнасці культурных традыцый, сацыяльнага вопыту і інш. Разам з тым ён уваходзіць у сістэму агульнаславянскіх і сусветных духоўных каштоўнасцей, у якую ўносіць свой дастойны ўклад і з якой мае трывалыя сувязі.
У спадчыну ад продкаў мы атрымалі духоўнае багацце, якім можам ганарыцца перад цэлым светам, якое, каб захаваць сваю самабытнасць у культурным сусвеце, павінны зберагчы і перадаць будучым пакаленням. Багацце гэта - народныя святы, абрады, звычаі. Без іх ведання і выкарыстання немагчыма сапраўднае выхаванне моладзі, фарміраванне яе духоўнасці. Ідэя адраджэння народных свят - новая ў духоўным жыцці нашай краіны. Сёння яна павінна стаць галоўным клопатам работнікаў культуры, настаўнікаў і выхавальнікаў, бібліятэкараў.
Увазе наведвальнікаў бібліятэкі прапануецца тэматычная выстаўка, якая дасць магчымасць не толькі падрабязна пазнаёміцца з тым, як святкавалі нашы продкі найбольш значныя ў іх жыцці каляндарныя і сямейна-бытавыя святы, але і дапаможа выкарыстаць элементы традыцыйнай абраднасці як пры правядзенні сучасных свят грамадскага гучання (прафесійных, каляндарных), так і сямейных урачыстасцей. У асобным раздзеле выстаўкі прадстаўлены дапаможнікі для настаўнікаў і выхавальнікаў дзіцячых садкоў, якія змяшчаюць метадычныя парады, сцэнарыі, гульні і іншыя матэрыялы для арганізацыі і правядзення святкаванняў.
Сацыяльным педагогам, класным кіраўнікам, педагогам-арганізатарам, бацькам, студэнтам педагагічных каледжаў і вышэйшых навучальных устаноў будзе карысным раздзел, дзе сабрана літаратура, якая раскрывае культурна-выхаваўчы патэнцыял беларускай народнай педагогікі. Толькі выхаванне, заснаванае на народнай мудрасці, валодае той выхаваўчай сілай, якой няма роўных у самых лепшых тэарэтычных сістэмах.
Экспазіцыя налічвае больш за 200 дакументаў - кнігі, часопісы, CD-ROM, ілюстратыўны матэрыял.
