ГалоўнаяПаслугiВіртуальныя сервісыВіртуальны цэнтр па дзейнасці міжнародных арганізацыйМіжнародныя адукацыйныя і навуковыя праграмы, стыпендыі, грантыМіжнародныя праграмы, стыпендыі, гранты для спецыялістаў

Міжнародныя праграмы, стыпендыі, гранты для спецыялістаў

У гэтым раздзеле прапануецца інфармацыя пра замежныя і міжнародныя праграмы стыпендыяльнай падтрымкі для паслядыпломнай адукацыі, павышэння кваліфікацыі, прафесійнай стажыроўкі за мяжой, у якіх могуць удзельнічаць грамадзяне Рэспублікі Беларусь.

Праграма мабільнасці для мэтанакіраваных межасобасных кантактаў (MOST)

Праект накіраваны на пашырэнне прафесіянальных кантактаў паміж грамадзянамі Беларусі і ЕС з мэтай абмену перадавым вопытам і паляпшэння ўзаемаразумення і дапускае фінансаванне паездак беларусаў у краіны ЕС у рамках міжнародных мерапрыемстваў, стажыровак, абменаў, наладжвання прафесійных сувязей. Заяўкі на ўдзел прымаюцца ад паўналетніх грамадзян Рэспублікі Беларусь, якія працуюць у сферы культуры, адукацыі, навукі, тэхналогій і інш.

Прыём заявак – не менш чым за 4 месяцы да запланаванага мерапрыемства.

Праграмы прафесійнай падрыхтоўкі МАШАВ (Ізраіль)

Ізраільскае агенцтва па развіцці міжнароднага супрацоўніцтва пры Міністэрстве замежных спраў Ізраіля запрашае прафесіяналаў на міжнародныя навучальныя курсы. Расходы на навучанне і знаходжанне ў Ізраілі аплачвае арганізатар.

Прыём заявак – на працягу года.

Стажыроўка ва Упраўленні Вярхоўнага камісара ААН па правах чалавека

Упраўленне Вярхоўнага камісара ААН па правах чалавека (УВКПЧ) прапануе праграму стажыроўкі, накіраваную на павышэнне дасведчанасці ў галіне праў чалавека на міжнародным узроўні і фарміраванне ўяўлення пра дзейнасць ААН. Працягласць стажыроўкі – ад 2 да 6 месяцаў. Да ўдзелу запрашаюцца студэнты старэйшых курсаў і выпускнікі ВНУ па спецыяльнасцях: міжнароднае права, паліталогія, гісторыя, сацыялогія. Кандыдаты павінны валодаць хаця б дзвюма з шасці афіцыйных моў ААН.

Прыём заявак да 30 красавіка і да 31 кастрычніка (штогод).

Стажыроўка ў Інтэрполе

Міжнародная арганізацыя крымінальнай паліцыі (Інтэрпол) праводзіць набор студэнтаў на стажыроўкі, якія будуць праходзіць у Генеральным сакратарыяце арганізацыі ў Ліёне (Францыя) або ў рэгіянальных бюро. Стажоры атрымаюць магчымасць азнаёміцца з дзейнасцю Інтэрпола, даведацца пра прынцыпы міжнароднага паліцэйскага супрацоўніцтва і папрацаваць у мультыкультурным асяроддзі. Працягласць стажыровак – ад 6 да 11 месяцаў. Да ўдзелу запрашаюцца студэнты або выпускнікі ВНУ па дысцыплінах, сумежных з дзейнасцю Інтэрпола.

Прыём заявак – на працягу года.

Стыпендыі для паслядыпломнага навучання ў галіне выяўленчага мастацтва, дызайну, візуальнай камунікацыі і кінематаграфіі (праграма Германскай службы акадэмічных абменаў)

Стыпендыя дае магчымасць прайсці стажыроўку (да 1 года) з мэтай павышэння прафесійнага майстэрства або курс навучання (ад 10 да 24 месяцаў) для атрымання ступені “Master” у адным з універсітэтаў Германіі. Праграма фінансуе толькі творчыя праекты. У конкурсе могуць удзельнічаць выпускнікі беларускіх ВНУ па спецыяльнасцях “Выяўленчае мастацтва”, “Дызайн”, “Візуальная камунікацыя”, “Кінематаграфія”.

Прыём заявак да 30 лістапада 2019 года.

Стыпендыі Каталіцкага фонду акадэмічных абменаў (Германія)

Каталіцкі фонд акадэмічных абменаў у рамках праграмы “Усходняя Еўропа” прапануе стыпендыі для навучання, павышэння навуковай кваліфікацыі або правядзення даследаванняў у Германіі для студэнтаў-хрысціян, выпускнікоў ВНУ і маладых вучоных з Беларусі. Стыпендыяты могуць самастойна выбраць навучальную ці навуковую ўстанову Германіі. Абмежаванняў у выбары спецыяльнасці або дысцыпліны няма. Патрабуецца добрае веданне нямецкай мовы.

Прыём заявак да 15 студзеня і 30 чэрвеня (штогод).

Сусветная стыпендыяльная праграма Йельскага ўніверсітэта

Праграма Yale Greenberg World Fellows Program прапануе спецыялістам, якія знаходзяцца ў сярэдзіне сваёй кар’еры, прайсці чатырохмесячную стажыроўку ў Йельскім універсітэце (ЗША). Праграма прызначана дапамагчы стыпендыятам пашырыць свой прафесійны і асабісты кругагляд і падрыхтавацца да ролі лідараў. У конкурсе могуць удзельнічаць прадстаўнікі шырокага кола прафесій з працоўным стажам ад 5 да 20 год і веданнем англійскай мовы.

Прыём заявак да 4 снежня 2019 года.

111