Міжнародныя праграмы, стыпендыі, гранты для навуковых супрацоўнікаў і аспірантаў

У гэтым раздзеле прапануецца інфармацыя пра міжнародныя праграмы стыпендыяльнай падтрымкі для правядзення навуковых даследаванняў, навучання, навуковых стажыровак за мяжой, у якіх могуць удзельнічаць грамадзяне Рэспублікі Беларусь.

Даследчыя стыпендыі DLR-DAAD (праграма Германскага цэнтра авіяцыі і касманаўтыкі / Германскай службы акадэмічных абменаў)

Германскі цэнтр авіяцыі і касманаўтыкі (DLR) – нацыянальнае аэракасмічнае агенцтва Германіі, якое праводзіць маштабныя даследаванні ў сферы авіяцыі, космасу, транспартных сістэм і энергіі. Да ўдзелу ў праграме даследчыцкіх стыпендый запрашаюцца высокакваліфікаваныя аспіранты, якія атрымалі ўніверсітэцкую ступень не больш за 6 год таму, спецыялісты з кандыдацкай ступенню, атрыманай не больш за 2 гады таму, а таксама вучоныя з вялікім прафесійным досведам у вышэйпералічаных галінах. Ад прэтэндэнтаў патрабуецца выдатнае валоданне англійскай мовай; веданне нямецкай мовы з’яўляецца дадатковай перавагай.

Тэрмін прыёму заявак: у залежнасці ад наяўных прапаноў аб удзеле ў праграме.

Марбахская стыпендыяльная праграма

Праграма стыпендыяльнай падтрымкі даследчыцкай працы з фондамі Нямецкага літаратурнага архіва ў Марбаху-на Некары для спецыялістаў з закончанай вышэйшай адукацыяй; магчымыя таксама кароткатэрміновыя стыпендыі для магістрантаў. Дадаткова архіў прапануе тэматычныя гранты, якія фінансуюцца партнёрскімі інстытутамі і арганізацыямі. Падаючы заяўку, прэтэндэнты мусяць у ёй абгрунтаваць неабходнасць працы з унікальнымі фондамі архіва, бібліятэкі, інфармацыйнага цэнтра ці калекцыі твораў мастацтва. Заяўкі могуць падавацца на нямецкай або англійскай мове.

Прыём заявак: да 31 сакавіка і да 30 верасня (штогод).

Нацыянальная стыпендыяльная праграма Славацкай Рэспублікі

Стыпендыя ўрада Славацкай Рэспублікі створана для падтрымкі мабільнасці замежных студэнтаў і выкладчыкаў ВНУ, аспірантаў, навуковых супрацоўнікаў і дзеячаў мастацтва і вылучаецца для праходжання вучэбнай, выкладчыцкай, навукова-даследчай або мастацкай стажыроўкі ў ВНУ і навукова-даследчых арганізацыях Славакіі.

Прыём заявак:

• да 31 кастрычніка – для стажыроўкі на працягу летняга семестра бягучага навучальнага года;
• да 30 красавіка – для стажыроўкі на працягу наступнага навучальнага года.

Постдоктарскія стыпендыі імя Жана Манэ

Цэнтр перспектыўных даследаванняў імя Роберта Шумана (Італія) прапануе гадавыя стыпендыі на правядзенне даследаванняў вучоным, якія атрымалі доктарскую ступень больш за 5 гадоў назад. Удзельнікі праграмы будуць працаваць над выбранай тэмай і прымаць удзел у навукова-даследчай дзейнасці Цэнтра. Пажаданыя тэмы даследаванняў: дзяржаўнае кіраванне і дэмакратыя; рэгуляванне рынкаў і кіраванне грашовымі патокамі; сусветная і еўрапейская палітыка XXI стагоддзя.

Прыём заявак да 25 кастрычніка (штогод).

Праграма Лізы Мейтнер для замежных вучоных (Аўстрыя)

Праграма дазваляе замежным навукоўцам папрацаваць у даследчых арганізацыях Аўстрыі. Да ўдзелу запрашаюцца высокакваліфікаваныя вучоныя з любой галіны ведаў, якія маглі б унесці ўклад у развіццё прымаючай аўстрыйскай навукова-даследчай установы. Працягласць праграмы – ад 12 да 24 месяцаў. Падача заяўкі ажыццяўляецца сумесна з аўстрыйскім сузаяўнікам.

Прыём заявак – на працягу года.

Праграма мабільнасці для мэтанакіраваных межасобасных кантактаў (MOST)

Праект накіраваны на пашырэнне прафесіянальных кантактаў паміж грамадзянамі Беларусі і ЕС з мэтай абмену перадавым вопытам і паляпшэння ўзаемаразумення і дапускае фінансаванне паездак беларусаў у краіны ЕС у рамках міжнародных мерапрыемстваў, стажыровак, абменаў, наладжвання прафесійных сувязей. Заяўкі на ўдзел прымаюцца ад паўналетніх грамадзян Рэспублікі Беларусь, якія працуюць у сферы культуры, адукацыі, навукі, тэхналогій і інш.

Прыём заявак – не менш чым за 4 месяцы да запланаванага мерапрыемства.

Стыпендыі Каталіцкага фонду акадэмічных абменаў (Германія)

Каталіцкі фонд акадэмічных абменаў у рамках праграмы “Усходняя Еўропа” прапануе стыпендыі для навучання, павышэння навуковай кваліфікацыі або правядзення даследаванняў у Германіі для студэнтаў-хрысціян, выпускнікоў ВНУ і маладых вучоных з Беларусі. Стыпендыяты могуць самастойна выбраць навучальную ці навуковую ўстанову Германіі. Абмежаванняў у выбары спецыяльнасці або дысцыпліны няма. Патрабуецца добрае веданне нямецкай мовы.

Прыём заявак да 15 студзеня і 30 чэрвеня (штогод).

Стыпендыі Універсітэта Фрыбурга для маладых замежных вучоных

Студэнты дактарантуры і кандыдаты навук маюць магчымасць атрымаць стыпендыю для выканання навуковага праекта ва Універсітэце Фрыбурга (Швейцарыя). Даследаванні могуць праводзіцца па любым з навуковых напрамкаў, што прапануюцца ўніверсітэтам.

Прыём заявак да 28 лютага і да 31 ліпеня (штогод).

Стыпендыі Урада Швейцарыі на 2020–2021 гг.

Урад Швейцарыі прапануе стыпендыі для навучання ў аспірантуры, а таксама для правядзення даследаванняў кандыдатамі навук і вучонымі без ступені ва ўніверсітэтах і навуковых цэнтрах Швейцарыі.

Прыём заявак з 1 верасня па 11 снежня 2019 года.

Стыпендыяльная праграма Цэнтра Рэйчал Карсан на 2020-2021 гг.

Цэнтр навакольнага асяроддзя і грамадства імя Рэйчал Карсан (г. Мюнхен, Германія) – міжнародны інтэрдысцыплінарны цэнтр даследаванняў і адукацыі ў галіне экалагічных і грамадскіх навук. У стыпендыяльнай праграме могуць прыняць удзел спецыялісты, якія абаранілі кандыдацкую дысертацыю, а таксама вучоныя з вялікім прафесійным досведам у названых галінах. Працягласць стажыровак – ад 4 да 12 месяцаў. Рабочая мова цэнтра – англійская.

Прыём заявак: да 31 студзеня 2020 года.