75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”. З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Поспехі савецкай арміі. Аднаўленне прадпрыемстваў. План рэканструкцыі Брэста. Выстаўка літаратуры ў Дзяржаўнай бібліятэцы БССР імя У.І. Леніна. Газета “Звязда” (№ 20).
Чырвоная Армія паспяхова і імкліва наступала. Да гэтага дня былі цалкам ачышчаны ад войскаў праціўніка Дамброўскі вугальны басейн на поўдні Польшчы і частка прамысловага раёна нямецкай Верхняй Сілезіі. У зводцы Саўінфармбюро паведамлялася аб узяцці 1-м Прыбалтыйскім фронтам Клайпеды і 150 населеных пунктаў ва Усходняй Прусіі, 1-м Украінскім фронтам – Катавіцаў і іншых гарадоў Польшчы. 4-ты Украінскі фронт вёў баі за Будапешт, а 1-шы Беларускі – у раёне Познані. (“Звязда”, № 20).
У газетах яшчэ не паведамляецца, але менавіта ў гэты дзень на Балтыйскім моры савецкай падводнай лодкай “С-13” быў патоплены варожы транспарт “Вільгельм Густлаф” ("1418 дней Великой Отечественной войны", Мінск, 2005 г., с. 375).
У Беларусі аднаўленне ідзе поўным ходам. Ужо працуе Бабруйская гарадская электрастанцыя, Смілавіцкі гарбарны завод. Пашырае асартымент сваёй прадукцыі Рудзенскі прамысловы камбінат. Плануецца не толькі аднаўляць, але і паляпшаць інфраструктуру гарадоў. Жыхары сучаснага Брэста могуць параўнаць, як увасобілася мара архітэктараў па рэканструкцыі Брэста: у газетным артыкуле апісаны план узвядзення новых будынкаў, праекты трыумфальнай і цэнтральнай плошчаў, галоўнага праспекта.
А ў Дзяржаўнай бібліятэцы імя У.І. Леніна (цяпер – Нацыянальная бібліятэка Беларусі) у зімовыя студзеньскія дні 1945 года адкрылася кніжная выстава, прысвечаная Вялікай Айчыннай вайне. На ёй былі прадстаўлены кнігі па гісторыі і літаратуры, даведнікі, фотаздымкі і плакаты. Вялікі раздзел быў прысвечаны сучаснай арміі. На асобных стэндах – літаратура пра слаўных сыноў роднай зямлі, Герояў Савецкага Саюза Гастэлу і Даватара, пра партызанскі рух. (“Звязда”, № 20).
Заставалася 100 дзён да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння НББ.
Усе матэрыялы праекта даступны на партале НББ і сайце “Беларусь у інфармацыйнай прасторы”.
