75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”. З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Фронт і тыл. Спектакль “Так і будзе”. Газета “Звязда” (№ 38).
…Идёт война народная…
В. Лебедзеў-Кумач
Многія газетныя рэпартажы, артыкулы, нататкі, звязаныя з жыццём у тыле, абпалены дыханнем вайны і нясуць на сабе нябачную прысутнасць фронту.
“За хутчэйшае аднаўленне і ўздым сельскай гаспадаркі” – пад такой назвай выйшаў перадавы артыкул у газеце “Звязда” (№ 38).
І ў ёй чырвонай ніткай праходзіць ваенная тэма. І ў ёй робіцца асаблівы акцэнт на сувязі фронту і тылу.
Чырвоная армія абвальвае магутны кулак на праціўніка.
Забяспечваюць гэты ўдар тэхнікай – канструктары, інжынеры, рабочыя. На заводах і фабрыках – з-пад іх пяра і мазольных рук выходзяць самалёты, танкі, гарматы.
Забяспечваюць гэты ўдар сілай – калгаснікі. “Хлеб – гэта таксама грозная зброя! Пад гэтым лозунгам павінна праходзіць падрыхтоўка да сяўбы і ўсіх сельскагаспадарчых работ бягучага года”, – піша аўтар.
У дні ўшанавання Чырвонай арміі і Ваенна-марскога флоту асабліва адчуваецца, што гэта вайна была асаблівай. Перафразіруючы Л. Талстога, скажам: магутны “кулак народнай вайны” няўхільна біў па праціўніку, набліжаючы яго гібель і нашу пераможную радасць.
На вялікай фатаграфіі ўнізе гэтай газетнай старонкі – шчаслівыя твары мінчан, якія ля Дома афіцэраў сабраліся пад залпамі салюту. У гонар 27-й гадавіны Чырвонай арміі.
Святкаванне гэтага дня (вечары, сход, выстава) прайшло і за мяжой: у Нью-Ёрку, Бялградзе, Варшаве, Бейруце.
У Віцебску Беларускі драматычны тэатр імя Якуба Коласа адзначыў свята воінаў і сваё вяртанне ў родны горад спектаклем “Так і будзе” па аднайменнай п’есе К. Сіманава. У ёй ужо перакінуты мост ад ваенна-франтавога да хуткага пасляваеннага мірнага жыцця.
Усяго 74 дні засталося да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння НББ.
Усе матэрыялы праекта даступны на партале НББ і сайце “Беларусь у інфармацыйнай прасторы”.
