75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Праграма развіцця сельскай гаспадаркі. Выстаўка літаратуры ў Дзяржаўнай бібліятэцы БССР імя У.І. Леніна. Балотазнаўства ў Акадэміі навук БССР. Газеты: "Звязда" (№ 49), "Советская Белоруссия" (№ 48), "Ленінская праўда" Дзяржынскага раёна (№ 17), "Уперад" Лідскага раёна (№ 15).
У газеце "Звязда" (№ 49) матэрыялы аб ваенных дзеяннях і паспяховым наступе Чырвонай арміі суседнічаюць з артыкулам пад назвай "Баявая праграма развіцця сельскай гаспадаркі Беларусі" (адразу адчуваецца баявы настрой і тут, у тыле). Уся 2-я старонка прысвечана Дзяржаўнаму плану развіцця сельскай гаспадаркі БССР на 1945 год, а 4-я – міжнародным падзеям. На 3-й старонцы размешчана вялікая калонка, прысвечаная адкрыццю ў Дзяржаўнай бібліятэцы БССР імя У.І. Леніна пастаяннай выстаўкі кніг "Вялікая Айчынная вайна ў літаратуры" з фотаздымкамі, ілюстрацыямі, плакатамі, асабістымі дакументамі. Акрамя кніг І.В. Сталіна і У.І. Леніна тут прадстаўлена літаратура пра вялікіх палкаводцаў, герояў Грамадзянскай і Вялікай Айчыннай войнаў.
Асобны раздзел складаюць мастацкія творы беларускіх пісьменнікаў пра вайну. Прадстаўляем некаторыя з гэтых кніг, якія захоўваюцца ў фондах Нацыянальнай бібліятэкі Беларусі: Я. Купала “Стихи о Родине”, А. Куляшоў “Сцяг брыгады”, А. Стаховіч “Шумяць лясы”, М. Танк “Янук Сяліба”, зборнікі “Белоруссия борется”, “Беларусь в огне”.
Цікавыя аб'явы размясціла "Советская Белоруссия" (№ 48). Дзяржаўнаму выдавецтву БССР патрабуюцца работнікі па 11-ці спецыяльнасцях, у тым ліку галоўны бухгалтар, бібліятэкар. Акадэмія навук БССР абвясціла прыём у кандыдацкую аспірантуру па 16-ці спецыяльнасцях, у тым ліку: беларуская літаратура, беларускае мастацтва, фізіялогія раслін, медыцына, хімія. Яшчэ некалькі спецыяльнасцей звязаны з прыродным багаццем Беларусі – балотамі і торфам: балотазнаўства, механізацыя торфаздабычы, механічная перапрацоўка торфу, хімічная тэхналогія торфу. Агулам пачатак навуковага вывучэння балот Беларусі (Заходняй экспедыцыяй) адносіцца да 2-й паловы XIX стагоддзя. У 2-м дзесяцігоддзі ХХ стагоддзя Мінскай балотнай доследнай станцыяй выдаваўся часопіс "Болотоведение" (друкаваная і электронная версіі часопіса даступныя ў сценах Нацыянальнай бібліятэкі Беларусі). У сучаснай Беларусі даследаванні працягваюцца ў рамках такога навуковага напрамку, як "Біягеахімія балот і тарфяных радовішчаў", на чале з акадэмікам М.М. Бамбалавым у Інстытуце прыродакарыстання Нацыянальнай акадэміі навук Беларусі. А водна-балотныя ўгоддзі Беларусі ахоўваюцца згодна з Рамсарскай канвенцыяй ("Канвенцыя аб водна-балотных угоддзях, якія маюць міжнароднае значэнне галоўным чынам у якасці месцапражыванняў вадаплаўных птушак").
У газету "Уперад" Лідскага раёна (№ 15) выкладчыца беларускай мовы Лідскага педагагічнага вучылішча паведаміла аб пачатку заняткаў, перапыненых праз вайну на 3 гады. Прычым пасля таго, як заняткі ўжо пачаліся, з гарадоў, вёсак і партызанскіх атрадаў у вучылішчы пацягнуліся на вучобу былыя студэнты.
А жыхары вёскі Малая Бераставіца (цяпер аграгарадок у Бераставіцкім раёне Гродзенскай вобласці) на агульным сходзе вырашылі арганізаваць калектыўную гаспадарку – калгас.
57 дзён засталося да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.
