Вольга Яўгенаўна нарадзілася ў г.п. Юрацішкі Гродзенскай вобласці ў сям’і вайскоўца. Адразу па заканчэнні сярэдняй школы ў 1964 годзе дзяўчына паступіла на гістарычны факультэт Беларускага дзяржаўнага ўніверсітэта імя У.І. Леніна (цяпер – Беларускі дзяржаўны ўніверсітэт). Атрымаўшы кваліфікацыю гісторыка, выкладчыка гісторыі і грамадазнаўства, па размеркаванні была накіравана на пасаду настаўніка ў Стаўбцоўскую школу-інтэрнат. Крыху пазней, са снежня 1968 года, працавала ў якасці малодшага навуковага супрацоўніка ў Інстытуце філасофіі і права Акадэміі навук БССР (цяпер – Інстытут філасофіі Нацыянальнай акадэміі навук Беларусі).
У Дзяржаўную бібліятэку БССР імя У.І. Леніна лёс прывёў Вольгу Яўгенаўну ў 1971 годзе, калі яна была прынята на пасаду бібліятэкара ў сектар міжбібліятэчнага абанемента. Менавіта тут яна асвоіла азы бібліятэчнай прафесіі і захапілася бібліяграфічнай дзейнасцю. Аналітычны склад розуму В.Я. Мазура і непадробная цікавасць да бібліяграфічных пошукаў спрыялі пераходу яе з 1980 года на працу ў аддзел навуковай інфармацыі па праблемах культуры і мастацтва (АНІКІ, або, як усе яго называлі, Інфармкультура). У гэтым структурным падраздзяленні пачаўся новы этап у яе бібліятэчнай кар’еры.
Вельмі хутка стаўшы высокакваліфікаваным спецыялістам, Вольга Яўгенаўна больш чым на 35 гадоў звязала сваё жыццё з Інфармкультурай. Працавала на многіх участках, на розных пасадах: была рэдактарам, старшым рэдактарам, вядучым бібліёграфам, галоўным бібліёграфам. Аператыўна, на высокім прафесійным узроўні выконвала бібліяграфічныя даведкі, прымала ўдзел у падрыхтоўцы “Систематического указателя неопубликованных материалов, поступивших в справочно-информационный фонд отдела научной информации по проблемам культуры и искусства ГБ БССР им. В.И. Ленина”, штомесячнага паказальніка “Новая литература по культуре и искусству БССР”. На працягу некалькіх гадоў В.Я. Мазура ўзначальвала працу сектара даведачна-інфармацыйнага фонду, затым сектара дыферэнцыраванага абслугоўвання кіраўніцтва, зарэкамендаваўшы сябе як дзейны і кампетэнтны арганізатар, адказны і справядлівы кіраўнік. Вольга Яўгенаўна паспяхова кіравала працай сектара, кваліфікавана і добразычліва абслугоўвала карыстальнікаў, займалася інфармацыйнай дзейнасцю па абслугоўванні спецыялістаў сферы культуры, у тым ліку супрацоўнікаў апарата Міністэрства культуры БССР.
28 лістапада 2001 года
З 1992 года Вольга Яўгенаўна была пераведзена на пасаду галоўнага бібліёграфа. У сферы яе прафесійных інтарэсаў было тэатральнае і музычнае мастацтва Беларусі: розныя аспекты дзейнасці тэатраў, іх рэпертуар, пытанні драматургіі, фестывальны рух, падрыхтоўка тэатральных і музычных кадраў, эстэтычнае выхаванне, гастролі тэатральных і музычных калектываў, прэміі ў галіне тэатральнага і музычнага мастацтва, міжнародныя культурныя сувязі і інш.
Скрыншот з электроннага каталога НББ з невялікай часткай работ В.Я. Мазура
За гады працы на гэтай пасадзе Вольга Яўгенаўна падрыхтавала і апублікавала больш за 120 інфармацыйна-аналітычных матэрыялаў у інфармацыйных зборніках “Аператыўная інфармацыя па праблемах культуры і мастацтва”, “Актуальныя праблемы культуры і мастацтва” і інш. Яны заўсёды атрымлівалі жывы водгук і былі запатрабаваны сярод чытачоў бібліятэкі, спецыялістаў тэатральнага і музычнага мастацтва. Не адно пакаленне мастацтвазнаўцаў атрымалі пуцёўку ў навуковае жыццё, выкарыстоўваючы ў тым ліку і публікацыі Вольгі Яўгенаўны Мазура. Многія з іх былі не толькі гасцямі аддзела, але і пазаштатнымі аўтарамі актуальных матэрыялаў.
Вольга Яўгенаўна (другая справа) з калектывам Інфармкультуры на агляднай пляцоўцы бібліятэкі, 16.06.2006
Дасягнуўшы пенсійнага ўзросту, В.Я. Мазура працягвала сваю дзейнасць у інфармацыйна-аналітычным аддзеле бібліятэкі, паспяхова працавала над зместам зборніка “Актуальныя праблемы культуры і мастацтва. 2001–2006 гг.”, прымала ўдзел у папаўненні базы даных “Беларусь у асобах і падзеях”.
Вольга Яўгенаўна другая справа, 15.09.2006
Калегі і сёння з глыбокай павагай і цяплом успамінаюць Вольгу Яўгенаўну як добразычлівага, ураўнаважанага і тактоўнага чалавека, аптымістычна зараджанага і ўлюбёнага ў прафесію і бібліятэку.
У маі 2016 года, прысвяціўшы працы ў Нацыянальнай бібліятэцы Беларусі больш за 45 гадоў, В.Я. Мазура сышла на заслужаны адпачынак.
Вольга Яўгенаўна другая злева
Калектыў бібліятэкі ад усяго сэрца віншуе Вольгу Яўгенаўну з цудоўнай юбілейнай датай і жадае моцнага здароўя на доўгія гады, аптымізму і бадзёрасці духу, любві, увагі і клопату блізкіх людзей, пабольш прыемных падарункаў лёсу і выдатнага настрою!
Выказваем вялікую падзяку за дапамогу ў падрыхтоўцы матэрыялу Людміле Васільеўне Гарбачовай.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.