Людміла Іванаўна нарадзілася ў 1947 годзе ў горадзе Легніца (Польшча) у сям’і вайскоўца. Скончыўшы ў 1966-м сярэднюю агульнаадукацыйную працоўную політэхнічную школу з вытворчым навучаннем № 23 горада Мінска, дзяўчына паступіла ў Мінскі дзяржаўны педагагічны інстытут імя М. Горкага (цяпер – Беларускі дзяржаўны педагагічны ўніверсітэт імя М. Танка), на бібліятэчны факультэт. Скончыўшы вучобу ў 1970 годзе, яна атрымала дыплом бібліятэкара-бібліёграфа вышэйшай кваліфікацыі.
Першае і адзінае месца працы Людмілы Іванаўны – Дзяржаўная бібліятэка БССР імя У.І. Леніна (цяпер – Нацыянальная бібліятэка Беларусі), куды яна была прынята ў жніўні 1970 года на пасаду бібліятэкара ў аддзел абслугоўвання. Цудоўна сябе зарэкамендаваўшы, у 1972 годзе Л.І. Станкевіч стала старшым бібліятэкарам навукова-метадычнага аддзела. Праз тры гады яна была пераведзена на пасаду старшага рэдактара навукова-даследчага аддзела, яшчэ праз два – галоўнага бібліятэкара.
Крайняя справа
Людміла Іванаўна займалася вывучэннем гісторыі бібліятэчнай справы Беларусі на аснове фондаў дзяржаўных архіваў. Яна з’яўлялася адказным складальнікам двух зборнікаў – “Библиотечное дело в БССР: документы и материалы. 1918–1941” (1978) і “Библиотечное дело в БССР: документы и материалы. 1941–1958” (1984), якія сталі крыніцазнаўчай базай для даследаванняў па гісторыі бібліятэчнай галіны краіны.
Досвед працы з архіўнымі дакументамі дазволіў Людміле Іванаўне ў 1985 годзе перайсці на пасаду галоўнага бібліёграфа ў аддзел старадрукаў і рэдкай кнігі (з 2005 года – навукова-даследчы аддзел кнігазнаўства). У гэтым структурным падраздзяленні, у сектары арганізацыі і навуковай апрацоўкі фондаў, а таксама ў сектары музейнай дзейнасці, яна прапрацавала больш за 20 гадоў.
Пра яе жаданне і імкненне прыносіць максімальную карысць на працоўным месцы пісала ў прадстаўленні ў кваліфікацыйную камісію загадчыца аддзела Таццяна Іванаўна Рошчына: “У Л.І. Станкевіч удала спалучаецца асабістая добрасумленнасць, скрупулёзнасць, няспешнасць, грунтоўнасць з прафесійнымі патрабаваннямі да тых, хто працуе з архіўнымі дакументамі, дзе патрэбны асаблівыя дбайнасць, увага, улік усіх дэталей. Цудоўна ведае сваю справу, што дазваляе ёй кваліфікавана кіраваць разнастайным калектывам, складальнікаў зборнікаў дакументаў з іншых ведамстваў – архіваў, інстытута культуры, інстытута гісторыі КПБ. Умее пераканаўча адстаяць свае пазіцыі пры працы з рэдакцыйнымі работнікамі”.
Людміла Іванаўна другая злева
Амаль паўстагоддзя Людміла Іванаўна аддала справе захавання і даследавання кніжнай і рукапіснай спадчыны Беларусі. Яна фарміравала асабістыя архіўныя фонды дзеячаў навукі і культуры рэспублікі, даследавала славяна-рускія рукапісы XVI–XX стст., пеўчыя крукавыя стараверскія рукапісы XVII–XX стст.
На аснове фондаў Нацыянальнай бібліятэкі Беларусі і Гомельскай абласной бібліятэкі Л.І. Станкевіч падрыхтавала каталог “Восточные рукописи (арабские, персидские, турецкие) ХIV–XIX вв.”.
Людміла Іванаўна ў цэнтры
Усе працы Людмілы Іванаўны адрозніваюцца высокім прафесіяналізмам, выключнай якасцю і навуковай выверанасцю рэзультатаў. Сваімі напрацоўкамі, вынікамі праведзеных даследаванняў Л.І. Станкевіч дзялілася на старонках прафесійнага друку, неаднаразова выступала з дакладамі, прысвечанымі пытанням кнігазнаўства, на навукова-практычных канферэнцыях.
Рукапісы і архіўныя дакументы, якія паступаюць у фонды Нацыянальнай бібліятэкі, праходзілі дбайную навуковую экспертызу Людмілы Іванаўны. Працавітая, ініцыятыўная, акуратная і адказная Л.І. Станкевіч набыла павагу калег і супрацоўнікаў навуковых бібліятэк рэспублікі, карысталася сярод іх заслужаным аўтарытэтам.
На працягу апошніх пяці гадоў яна працавала на пасадзе бібліёграфа ў аддзеле індэксавання дакументаў.
Прафесіяналізм Людмілы Іванаўны быў адзначаны граматай Міністэрства культуры БССР, Ганаровай граматай Нацыянальнай бібліятэкі Беларусі, Ганаровай граматай Беларускага рэспубліканскага камітэта прафсаюза, шэрагам падзяк ад адміністрацыі бібліятэкі.
У 2016 годзе Л.І. Станкевіч пайшла на заслужаны адпачынак.
Калектыў Нацыянальнай бібліятэкі Беларусі віншуе Людмілу Іванаўну з юбілейнай датай і ад усёй душы жадае моцнага здароўя на доўгія гады, дабрабыту і бадзёрасці духу, любві і ўвагі родных і блізкіх людзей.
Матэрыял падрыхтаваны галоўным бібліятэкарам навукова-даследчага аддзела бібліятэказнаўства Наталляй Карняйчук.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы "Партрэты: гісторыя бібліятэкі ў асобах".