Галіна Сяргееўна нарадзілася ў г. Баку ў сям’і вайскоўца.
У 1965 годзе дзяўчына скончыла сярэднюю школу і непрацяглы час працавала лабаранткай, пазней – чарцёжніцай у Каспійскім вышэйшым ваенна-марскім Чырванасцяжным вучылішчы імя С.М. Кірава (КВВМЧВ імя С.М. Кірава, сёння – Азербайджанскае вышэйшае ваенна-марское вучылішча).
З 1966 года Галіна пераехала па месцы службы мужа ў пасёлак Фінвал Камчацкага краю. Праз сем гадоў яна вярнулася ў Баку і ўладкавалася на працу ў КВВМЧВ імя С.М. Кірава ў якасці супрацоўніцы бібліятэкі. У гэтым жа годзе яна паступіла на завочнае аддзяленне бібліятэчнага факультэта Казахскага дзяржаўнага педагагічнага інстытута ў Алма-Аце, які паспяхова скончыла ў 1978 годзе.
У Фундаментальнай бібліятэцы вучылішча Галіна Сяргееўна прайшла шлях ад бібліятэкара да загадчыцы аддзела камплектавання і апрацоўкі кніжных фондаў.
У сувязі са звальненнем мужа са службы ў жніўні 1989 года сям’я пераехала на новае месца жыхарства ў Мінск. 1 лістапада Галіна Сяргееўна паступіла на пасаду бібліятэкара аддзела аўтарэфератаў Дзяржаўнай бібліятэкі БССР імя У.І. Леніна (сёння – Нацыянальная бібліятэка Беларусі, НББ).
З красавіка 1990 года была пераведзена на пасаду старшага рэдактара ў даведачна-інфармацыйны аддзел. З ліпеня 1990 па сакавік 1995 года яна ўзначальвала працу сектара інфармацыйнага абслугоўвання.
Галіна Сяргееўна крайняя злева ў ніжнім шэрагу
Далейшы прафесійны шлях Г.С. Селькінай быў звязаны з працай аддзела бібліятэказнаўства і аддзела аўтаматызацыі бібліятэчных працэсаў.
Сваё прадстаўніцтва ў сетцы Інтэрнэт Нацыянальная бібліятэка Беларусі атрымала ў 1998 годзе. Распрацоўка першай версіі партала, яго дызайну і інфармацыйнага напаўнення ажыццяўлялася навукова-вытворчай фірмай ІНЕАК і спецыялістамі бібліятэкі. Важкі ўклад у гэты працэс зрабіла і Галіна Сяргееўна, з’яўляючыся адным з адказных выканаўцаў распрацоўкі стратэгіі развіцця і структуры сайта бібліятэкі.
На перыяд працоўнай дзейнасці Г.С. Селькінай прыйшлося ўзвядзенне новага будынка бібліятэкі, маштабны пераезд і ўрачыстае адкрыццё “алмаза ведаў” для чытачоў. Ва ўсе гэтыя працэсы дзейна, з поўнай аддачай уключылася і Галіна Сяргееўна.
У 2004 годзе ў структуры НББ быў створаны аддзел бібліятэчна-інфармацыйных тэхналогій. Апошнія гады працы Галіны Сяргееўны звязаны менавіта з гэтым структурным падраздзяленнем.
Сваімі напрацоўкамі Г.С. Селькіна актыўна дзялілася з калегамі, выступаючы з дакладамі на канферэнцыях і семінарах. У кола яе прафесійных інтарэсаў уваходзіла выкарыстанне аўтаматызаваных тэхнічных сродкаў дастаўкі дакументаў у новым будынку НББ (UNICAR/TELELIFT), засваенне сучасных інфармацыйных тэхналогій і ўкараненне іх у працу бібліятэк і інш.
Галіна Сяргееўна пайшла на заслужаны адпачынак у чэрвені 2011 года, прысвяціўшы бібліятэцы больш за 20 гадоў свайго прафесійнага жыцця.
Галіна Сяргееўна крайняя справа, 2017 год
Г.С. Селькіна і сёння актыўна цікавіцца жыццём бібліятэкі, падтрымлівае сувязь са многімі калегамі, на старонках яе форуму можна знайсці інфармацыю ледзь не пра ўсіх супрацоўнікаў НББ розных перыядаў.
Усе, каму пашчасціла працаваць з Галінай Сяргееўнай, адгукаюцца аб ёй як аб ініцыятыўным, творчым, таленавітым і высокапрафесійным спецыялісце, добрым, спагадлівым і вясёлым чалавеку.
Калектыў Нацыянальнай бібліятэкі Беларусі ад усяго сэрца віншуе Галіну Сяргееўну з юбілеем і жадае здароўя на доўгія гады, невычэрпнай энергіі, светлага шчасця, радасці сэрца і душы. Хай кожны Ваш дзень будзе напоўнены гармоніяй і спакоем, добрымі весткамі і шчырымі ўсмешкамі блізкіх і родных людзей!
Матэрыял падрыхтаваны навукова-даследчым аддзелам бібліятэказнаўства.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы "Партрэты: гісторыя бібліятэкі ў асобах".
