Віялета Мікалаеўна нарадзілася ў 1947 годзе ў Мінску. У бібліятэчную справу яна прыйшла праз год пасля заканчэння сярэдняй школы. Усё сваё прафесійнае жыццё В.М. Карсека прысвяціла Нацыянальнай бібліятэцы Беларусі, дзе з 1966 года прайшла шлях ад малодшага бібліятэкара да загадчыцы аддзела мастацтва.
Сумяшчаючы працу ў бібліятэцы з вучобай, у 1973 годзе яна скончыла Мінскі дзяржаўны педагагічны інстытут імя М. Горкага (цяпер Беларускі дзяржаўны педагагічны ўніверсітэт імя М. Танка) па спецыяльнасці “бібліятэказнаўства і бібліяграфія”.
Аб прафесійных кампетэнцыях Віялеты Мікалаеўны пісала ў прадстаўленні ў кваліфікацыйную камісію загадчыца аддзела мастацтваў Валянціна Карнееўна Жак: “Энергічная, дзелавая, клапоціцца аб эфектыўным выкарыстанні працоўнага часу, адшуквае магчымасці для скарачэння норм на выкананне рабочых працэсаў... З гонарам носіць званне «лепшы па прафесіі», перадае свае веды маладым супрацоўнікам аддзела, з’яўляючыся іх настаўнікам”.
Выдатныя тэарэтычныя веды і вялікі практычны вопыт дазвалялі В.М. Карсека на высокім прафесійным узроўні аказваць метадычную дапамогу бібліятэкам рэспублікі. Яна кансультавала бібліятэкараў па пытаннях арганізацыі нотных фондаў, стварэння даведачнага апарата і папулярызацыі літаратуры аб музыцы сярод чытачоў, выступала на семінарах, чытала лекцыі ў Рэспубліканскім інстытуце праблем культуры, кіравала практыкай студэнтаў у Беларускай дзяржаўнай акадэміі музыкі, вяла на Беларускім радыё цыкл перадач “На нотнай паліцы” (з фондаў фанатэкі Дзяржаўнай бібліятэкі БССР імя У.І. Леніна).
Віялета Мікалаеўна адказвала за арганізацыю тэхналагічных працэсаў па стварэнні баз даных нот і аўдыявізуальных дакументаў, у ролі аўтара, складальніка або рэдактара падрыхтавала больш за 20 дапаможнікаў па музыцы. Найбольш значныя з іх – рэкамендацыйныя паказальнікі “Мир дискотек”, “Вокально-инструментальные ансамбли”, “Из истории джаза” і іншыя.
Прафесійныя заслугі і дзелавыя якасці Віялеты Мікалаеўны Карсека былі адзначаны Ганаровай граматай Нацыянальнага сходу Рэспублікі Беларусь (2002) і шэрагам падзяк ад дырэкцыі. Яе імя неаднаразова заносілася на Дошку гонару Дзяржаўнай бібліятэкі БССР імя У.І. Леніна.
Віялета Мікалаеўна карысталася вялікім аўтарытэтам і павагай сярод калег і кіраўніцтва. Яна не раз была рэкамендавана ў склад турыстычных груп Міністэрства культуры БССР для паездак у Венгрыю (1969), Фінляндыю (1970), Германскую Дэмакратычную Рэспубліку (1974), Аўстрыю (1983).
Працоўная біяграфія В.М. Карсека заўсёды была цесна звязана з грамадскай працай: яна з’яўлялася намеснікам сакратара камітэта камсамола бібліятэкі, членам рэдакцыі “Комсомольского прожектора”, працяглы час – прафаргам свайго аддзела, прадстаўляла бібліятэку на гарадскіх спаборніцтвах у якасці актыўнага члена сандружыны.
Віялета Мікалаеўна другая справа
Дасягнуўшы пенсіённага ўзросту, яна працягвала працаваць у сваім аддзеле на пасадзе бібліятэкара.
У 2007 годзе В.М. Карсека сышла на заслужаны адпачынак, прысвяціўшы бібліятэцы больш за 40 гадоў прафесійнага жыцця.
Калектыў Нацыянальнай бібліятэкі Беларусі віншуе Віялету Мікалаеўну з юбілейнай датай і ад усёй душы жадае моцнага здароўя на доўгія гады, аптымізму і бадзёрасці духу, любві, увагі і клопату блізкіх, больш прыемных падарункаў лёсу і выдатнага настрою!
Матэрыял падрыхтаваны навукова-даследчым аддзелам бібліятэказнаўства.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы “Партрэты: гісторыя бібліятэкі ў асобах”.
