12 лютага спаўняецца 70 гадоў Сяргею Іванавічу Чарнову, спецыялісту ў галіне інфармацыйных тэхналогій, які стаяў ля вытокаў інфарматызацыі бібліятэк краіны.
Сяргей Іванавіч нарадзіўся ў 1950 годзе ў горадзе Ульянаўску, у сям’і вайскоўца. У 1972 годзе скончыў энергетычны факультэт Беларускага політэхнічнага інстытута (цяпер – Беларускі нацыянальны тэхнічны ўніверсітэт) па спецыяльнасці “электрычныя станцыі” і быў размеркаваны ў Беларускі філіял Дзяржаўнага навукова-даследчага энергетычнага інстытута імя Г.М. Кржыжаноўскага (БелЭНІН).
Сяргей Іванавіч заўсёды імкнуўся да засваення новых ведаў і ўдасканалення навыкаў. Так, у 26 гадоў ён скончыў факультэт павышэння кваліфікацыі кіруючых работнікаў і спецыялістаў Міністэрства прыборабудавання, сродкаў аўтаматызацыі і сістэм кіравання СССР (Мінпрыбор СССР) па спецыяльнасці “праграмаванне М-6000”, а ў 33 гады – Маскоўскі інстытут павышэння кваліфікацыі Мінпрыбора па курсе “Аперацыйная сістэма рэальнага часу для УВК СМ-3, СМ-4”.
Да таго, як стаў супрацоўнікам Нацыянальнай бібліятэкі Беларусі (НББ), Сяргей Іванавіч працаваў у БелЭНІН, а таксама ў Цэнтральным навукова-даследчым і праектна-тэхналагічным інстытуце арганізацыі і тэхнікі кіравання (ЦНДІТК).
90-я гады сталі часам ўкаранення інфармацыйных тэхналогій у дзейнасць бібліятэк Беларусі. У НББ першыя камп’ютары з’явіліся ў 1990 годзе. З сакавіка 1997 года Сяргей Іванавіч уступіў на пасаду намесніка дырэктара Нацыянальнай бібліятэкі Беларусі па аўтаматызацыі бібліятэчных працэсаў, узначаліўшы гэты няпросты інавацыйны ўчастак працы. Ён унёс значны ўклад у працэс інфарматызацыі НББ, а таксама ўсіх бібліятэк краіны.
У складаны і адказны для бібліятэкі перыяд пераезду ў новы будынак С.І. Чарноў стаяў ля вытокаў распрацоўкі і ўкаранення комплексу інфармацыйна-тэхналагічных сістэм.
Увесь свой назапашаны вопыт ён адлюстроўваў на старонках прафесійнага друку, асвятляў у выступленнях на канферэнцыях і семінарах.
За актыўны ўдзел і вялікі асабісты ўклад у стварэнне, развіццё і мадэрнізацыю аўтаматызаванай сістэмы НББ у 2005 годзе Сяргей Іванавіч быў узнагароджаны Ганаровай граматай Нацыянальнай бібліятэкі Беларусі.
У 2010 годзе за добрасумленную працу па распрацоўцы і рэалізацыі дзяржаўных праграм і праектаў у сферы аўтаматызацыі бібліятэчных працэсаў С.І. Чарноў быў ганараваны нагрудным знакам Міністэрства культуры “За ўклад у развіццё культуры Беларусі”.
Сяргей Іванавіч прапрацаваў у НББ да 2011 года. Калегі з цяплом узгадваюць яго як ідэйнага, лаяльнага і ўважлівага да людзей кіраўніка, вясёлага апавядальніка, заўзятага вандроўніка і рыбалова. Ён і сёння актыўна цікавіцца жыццём бібліятэкі, аб’ядноўваючы вакол сябе ўсю пляяду “аўтаматызатараў”.
Калектыў Нацыянальнай бібліятэкі Беларусі віншуе Сяргея Іванавіча з юбілейнай датай і ад усёй душы жадае моцнага здароўя на доўгія гады, бадзёрасці духу і невычэрпнага энтузіязму!
Матэрыял падрыхтаваны навукова-даследчым аддзелам бібліятэказнаўства.
