13 мая спаўняецца 95 гадоў з дня нараджэння Зінаіды Адамаўны Валністай, ветэрана Нацыянальнай бібліятэкі Беларусі.
Зінаіда Адамаўна нарадзілася ў 1925 г. у вёсцы Навінкі Бабруйскай вобласці. У 1940 г. яна скончыла восем класаў Чырвонаслабодскай сярэдняй школы, аднак вайна ўнесла свае карэктывы ў лёс шаснаццацігадовай Зінаіды. Нароўні з дарослымі дзяўчына працавала ў сельскай гаспадарцы, уносячы свой пасільны ўклад у агульную перамогу. У пасляваенныя гады працягнула вучобу ў школе. У 1947 г. паступіла ў Мінскі дзяржаўны педагагічны інстытут імя М. Горкага (зараз – Беларускі дзяржаўны педагагічны ўніверсітэт імя Максіма Танка) на бібліятэчны факультэт, пасля заканчэння якога ў 1951 г. была накіравана на пасаду старшага бібліятэкара ў Дзяржаўную бібліятэку БССР імя У.І. Леніна.
У гэтым жа годзе яна выйшла замуж. Муж працаваў механікам на Мінскім трактарным заводзе.
З 1957 г. пачалася працоўная дзейнасць Зінаіды Адамаўны ў аддзеле кнігазахавання, дзе яна праводзіла вялікую работу па забеспячэнні захаванасці дакументнай спадчыны краіны, асаблівую ўвагу надавала арганізацыі падсобных фондаў.
Досвед працы і практычныя навыкі, прафесійныя веды і ўменні дазволілі З.А. Валністай у 1974 г. узначаліць сектар падсобных фондаў аддзела кнігазахавання.
Зінаіда Адамаўна карысталася вялікім аўтарытэтам і павагай сярод калег і кіраўніцтва бібліятэкі. Пра гэта сведчыць і той факт, што ў 1981 г. яна была рэкамендавана ў склад адмысловай турыстычнай групы Міністэрства культуры БССР для наведвання Германскай Дэмакратычнай Рэспублікі.
З.А. Валністая была актыўным грамадскім дзеячам: абіралася членам мясцовага камітэта, была прафсаюзным арганізатарам свайго аддзела.
Усе заслугі і дасягненні Зінаіды Адамаўны высока ацаніла кіраўніцтва бібліятэкі: яна была ўзнагароджана Ганаровымі граматамі Міністэрства культуры БССР і БРК прафсаюзаў работнікаў культуры, значком “За выдатную працу” і інш.
У 1983 г. З.А. Валністая сышла на заслужаны адпачынак, прысвяціўшы больш за 30 гадоў свайго жыцця бібліятэцы.
Супрацоўнікі Нацыянальнай бібліятэкі Беларусі ўспамінаюць Зінаіду Адамаўну з павагай і любоўю, як шчырага чалавека з выключнай працавітасцю і добрасумленным стаўленнем да працы.
Машчанка Надзея Іосіфаўна прысвяціла ёй паэтычныя радкі:
В нашем дружном коллективе
Вы трудились много лет,
И оставили в отделе
Дорогой, прекрасный след.
Всегда безотказная, скромная, честная,
Отдел выручала на всех этажах.
И ноги у вас к концу дня отекали,
Болели, гудели, но вы не стонали…
Зінаіда Адамаўна скончыла свой жыццёвы шлях у 2019 годзе. Пахавана ў Заслаўі.
Матэрыял падрыхтаваны навукова-даследчым аддзелам бібліятэказнаўства.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы навін "Партрэты: гісторыя бібліятэкі ў асобах".
