Маргарыта Яфімаўна нарадзілася ў 1937 годзе ў Мінску ў сям’і служачых. Вялікая Айчынная вайна ўнесла свае карэктывы ў мірны ўклад жыцця сям’і: пакуль бацька ваяваў у партызанскім атрадзе імя С. Лазо, яны з мамай вымушаны былі эвакуіравацца ў Татарскую АССР.
Пасля завяршэння ваенных дзеянняў жыццё вярнулася ў мірнае рэчышча, і ў 1946 годзе Маргарыта пайшла ў першы клас. Скончыўшы сярэднюю школу, дзяўчына паступіла на бібліятэчны факультэт Мінскага дзяржаўнага педагагічнага інстытута імя М. Горкага (сёння Беларускі дзяржаўны педагагічны ўніверсітэт імя М. Танка). Вучобу ў ВНУ яна паспяхова сумяшчала з пасадай бібліятэкара ва Урадавай бібліятэцы імя М. Горкага (сёння Прэзідэнцкая бібліятэка Рэспублікі Беларусь).
У 1960 годзе М.Я. Кандратоўская атрымала дыплом бібліятэкара-бібліёграфа вышэйшай кваліфікацыі і была прынята на працу ў аддзел кнігазахоўвання Дзяржаўнай бібліятэкі БССР імя У.І. Леніна (сёння Нацыянальная бібліятэка Беларусі).
У хуткім часе Маргарыта Яфімаўна ўжо цудоўна ведала фонды бібліятэкі і іх структуру, праявіла сябе як дасведчаны спецыяліст. У 1963 годзе яе перавялі на пасаду старшага бібліятэкара.
З 1974 года пачаўся перавод даваеннага фонду бібліятэкі з сістэматычнай расстаноўкі на інвентарную. М.Я. Кандратоўскай як спецыялісту, які больш за дзесяць гадоў працаваў з дакументамі гэтага перыяду і які валодае неабходнымі ведамі па іх спецыфіцы, было даручана займацца гэтым участкам працы.
Праз два гады прафесійны шлях Маргарыты Яфімаўны прадоўжыўся ў аддзеле камплектавання. Будучы супрацоўнікам з вялікім вопытам работы і выдатнымі ведамі, Маргарыта Яфімаўна з 1978 года ўзначаліла ў аддзеле сектар рэтраспектыўнага камплектавання.
З матэрыялаў асабістай справы М.Я. Кандратоўскай: “Любіць і ведае кнігу, разумее яе не толькі як самакаштоўнасць, але – галоўным чынам, з пункту гледжання яе неабходнасці сучаснаму і будучаму чытачу. Ахвотна дзеліцца сваім вопытам і ведамі не толькі з супрацоўнікамі свайго аддзела, але і ўсёй бібліятэкі. Выступае з рэфератамі на занятках па павышэнні кваліфікацыі супрацоўнікаў аддзела”.
Маргарыта Яфімаўна крайняя справа ў ніжнім шэрагу, 1982 год
Непадробная цікавасць да кнігі, неверагодная працавітасць, выключнае веданне фонду і даведачнага апарату бібліятэкі дазвалялі Маргарыце Яфімаўне не толькі на высокім прафесійным узроўні займацца пытаннямі камплектавання фондаў бібліятэкі, але і кампетэнтна аказваць дапамогу чытачам у пошуку і падборцы неабходнай літаратуры, выконваць нават самыя складаныя іх запыты.
У 1979 годзе ў зборніку “Из истории белорусской библиографии и книжных фондов” пабачыў свет артыкул “Личная библиотека Е.Ф. Карского в фондах Государственной библиотеки БССР им. В.И. Ленина”, падрыхтаваны Маргарытай Яфімаўнай у суаўтарстве з Нінай Барысаўнай Ватацы. У публікацыі аўтарамі ўпершыню была апісана самая буйная і найбольш каштоўная з усіх наяўных на той момант у бібліятэцы асабістых збораў калекцыя.
М.Я. Кандратоўская прымала актыўны ўдзел у грамадскім жыцці бібліятэкі, многія гады была старшынёй таварыства выратавання на водах (ОСВОД) і кіраўніком групы грамадзянскай абароны.
Яна карысталася заслужаным аўтарытэтам у калектыве і сярод чытачоў. Калегі памятаюць Маргарыту Яфімаўну як ініцыятыўнага, добрасумленнага і разважлівага супрацоўніка, чулага, выключна ўважлівага і добразычлівага чалавека. Многія супрацоўнікі і сёння з удзячнасцю ўспамінаюць увесь той прафесійны вопыт і любоў да бібліятэчнай справы, якія яны перанялі ад яе.
Маргарыта Яфімаўна з маладымі спецыялістамі, сярэдзіна 1970-х
Прафесіяналізм Маргарыты Яфімаўны быў адзначаны Ганаровай граматай Міністэрства культуры БССР і БРК прафсаюза работнікаў культуры, медалём “Ветэран працы”, яе імя неаднаразова можна было ўбачыць на Дошцы гонару бібліятэкі.
У канцы 1994 года Маргарыта Яфімаўна звольнілася з бібліятэкі і з’ехала з краіны. На жаль, з цягам часу сувязь з ёй была страчана і далейшы яе лёс нам невядомы. Мы працягваем пошукавую працу і будзем удзячны за дапамогу ўсім, хто валодае якой-небудзь інфармацыяй і можа дапамагчы дапоўніць матэрыял.
Матэрыял падрыхтаваны навукова-даследчым аддзелам бібліятэказнаўства.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы "Партрэты: гісторыя бібліятэкі ў асобах".
