Фёдар Юльянавіч нарадзіўся 17 лютага 1916 года ў вёсцы Аксаміты Капыльскага раёна Мінскай вобласці ў шматдзетнай сялянскай сям’і. Па сканчэнні Грозаўскай сямігодкі, сямнаццацігадовым хлопцам Фёдар пачаў працаваць у мясцовым калгасе “Советская Страна”.
Праз год ён вырашыў працягнуць навучанне. Для паступлення абраў Мінскі архітэктурна-будаўнічы тэхнікум (сёння – Мінскі дзяржаўны архітэктурна-будаўнічы каледж), які скончыў у 1938 годзе. Адразу ж пасля заканчэння вучобы Фёдар Юльянавіч быў прызваны ў тэхнічны склад памежных войск Народнага камісарыяту ўнутраных спраў Беларускай ваеннай акругі. Большую частку сваёй вайсковай кар’еры ён узначальваў аддзяленні будаўніцтва і рамонту будынкаў розных вайсковых частак, а з 1957 па 1963 год – усёй Беларускай ваеннай акругі.
Пасля дваццаці пяці гадоў службы Ф.Ю. Касцюк скончыў сваю вайсковую кар’еру ў званні маёра. Па выніках службы ён быў узнагароджаны ордэнам Чырвонай Зоркі і шэрагам дзяржаўных і ведамасных медалёў: “За баявыя заслугі”, “За перамогу над Германіяй у Вялікай Айчыннай вайне 1941–1945 гг.”, “40 гадоў Узброеных Сіл СССР”, “30 гадоў Савецкай Арміі і Флоту”, “За бездакорную службу” І ступені.
У 1963 годзе Фёдар Юльянавіч паступіў на працу ў Дзяржаўную бібліятэку БССР імя У.І. Леніна на пасаду старшага інжынера-будаўніка. Ім былі арганізаваны значныя мерапрыемствы па рэканструкцыі старога кнігасховішча і рамонце асноўных збудаванняў. Па ініцыятыве і пад непасрэдным кіраўніцтвам Ф.Ю. Касцюка была ўзведзена надбудова бібліятэкі, якая дазволіла істотна палепшыць працу аддзела мастацтва. У адпаведнасці са сваёй адукацыяй Фёдар Юльянавіч займаў выключна інжынерна-тэхнічныя пасады – старшага інжынера па эксплуатацыі будынкаў, старшага тэхніка, інжынера-тэхнолага. Але ў якім бы чыне ён ні працаваў, заўсёды вельмі адказна, з поўнай самааддачай ставіўся да пытанняў развіцця матэрыяльна-тэхнічнай базы бібліятэкі.
За гады працы ў Дзяржаўнай бібліятэцы Ф.Ю. Касцюк атрымаў некалькі ганаровых грамат Міністэрства культуры БССР і БРК прафсаюза работнікаў культуры, яго імя неаднаразова заносілася на Дошку гонару.
Кажуць, незаменных людзей не бывае. Але не пра Фёдара Юльянавіча. У доказ гэтаму – матэрыялы яго асабістай справы. Ён неаднойчы рабіў спробу звольніцца па ўзросце, але “з-за часовай вытворчай неабходнасці” кіраўніцтва адмаўляла яму.
Фёдар Юльянавіч быў высокапрафесійным спецыялістам, на якім трымалася гаспадарчая частка работы ўсёй бібліятэкі.
Прысвяціўшы бібліятэцы 24 гады свайго прафесійнага жыцця, у студзені 1987 года Ф.Ю. Касцюк сышоў на пенсію.
На вялікі жаль, дакументы, якія захаваліся ў Нацыянальнай бібліятэцы Беларусі, не дазваляюць вызначыць далейшы жыццёвы шлях Фёдара Юльянавіча. Мы працягваем пошукавую працу і будзем удзячныя за дапамогу ўсім, хто яго ведаў і валодае якой-небудзь інфармацыяй.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.