Нарадзілася Еўдакія Сяргееўна ў 1930 годзе ва Украіне ў сяле Кірыкоўка Ахтырскага раёна Сумской вобласці ў сям’і рабочага.
Калі пачалася Вялікая Айчынная вайна, адзінаццацігадовая Еўдакія скончыла тры класы Кірыкоўскай сярэдняй школы. Гады акупацыі перапынілі яе вучобу. У 1948 годзе Еўдакія Сяргееўна з маці пераехалі ў г. Ахтырку, дзе дзяўчына і скончыла сярэднюю школу. Затым паступіла ў Харкаўскі бібліятэчны інстытут (цяпер – Харкаўская дзяржаўная акадэмія культуры).
У 1954 годзе Еўдакія Сяргееўна – выпускніца інстытута – выйшла замуж і пераехала ў г. п. Рось Ваўкавыскага раёна Гродзенскай вобласці па месцы службы мужа. Сваю прафесійную дзейнасць яна пачала ў якасці загадчыка бібліятэкай вайсковай часткі. У 1960 годзе ў сувязі з дэмабілізацыяй мужа Еўдакія Сяргееўна пераехала на пастаяннае месца жыхарства ў Мінск.
Працоўная дзейнасць Е.С. Шалупінай у Дзяржаўнай бібліятэцы БССР імя У.І. Леніна (цяпер – Нацыянальная бібліятэка Беларусі) пачалася з 1961 года, калі яна была прынята на працу бібліятэкарам у аддзел кнігазахавання. У гэтым структурным падраздзяленні яна прайшла ўвесь свой далейшы прафесійны шлях.
Цудоўныя веды і назапашаны вопыт дазволілі Еўдакіі Сяргееўне ў 1978 годзе ўзначаліць сектар групавой апрацоўкі.
Калегі ўспамінаюць Е.С. Шалупіну як выдатнага, дасведчанага ў сваёй справе спецыяліста, прынцыповага і ўмелага кіраўніка, здольнага дакладна арганізаваць зладжаную работу калектыву.
Матэрыялы асабістай справы сведчаць, што яшчэ ў 1983 годзе падчас атэстацыі Еўдакіяй Сяргееўнай была адзначана мэтазгоднасць стварэння ў бібліятэцы чытальнай залы перыёдыкі. Прайшло больш за 20 гадоў і прапанова Е.С. Шалупінай была ўвасоблена ў жыццё ў новым будынку Нацыянальнай бібліятэкі Беларусі.
Еўдакія Сяргееўна карысталася вялікім аўтарытэтам і павагай не толькі сярод калег, але і ў кіраўніцтва бібліятэкі. Пра гэта сведчыць і той факт, што ў 1981 годзе яна была рэкамендавана ў склад спецыяльнай турыстычнай групы Міністэрства культуры БССР для наведвання Германскай Дэмакратычнай Рэспублікі, а ў 1985 г. – для паездкі ў Фінляндыю.
Ужо будучы на пенсіі, Е.С. Шалупіна на працягу шасці гадоў працягвала працаваць на карысць бібліятэкі ў сваім родным аддзеле.
Еўдакія Сяргееўна прымала ўдзел і ў грамадскім жыцці калектыву: абіралася членам народнага кантролю, была спецыялістам па ахове працы.
Праца Е.С. Шалупінай была неаднаразова адзначана ўзнагародамі рознага ўзроўню: Ганаровымі граматамі Міністэрства культуры БССР і БРК прафсаюзаў работнікаў культуры, значком “За выдатную працу”, падзякамі і інш. Яна неаднаразова заносілася на Дошку Пашаны бібліятэкі, ёй было прысвоена званне “Лепшы па прафесіі”.
Шалупіна Еўдакія Сяргееўна ў 1992 г. сышла на заслужаны адпачынак, прысвяціўшы бібліятэцы больш за 30 гадоў свайго жыцця.
Калектыў Нацыянальнай бібліятэкі Беларусі ад усяго сэрца віншуе Еўдакію Сяргееўну з юбілеем і жадае моцнага здароўя, даўгалецця, бадзёрасці духу і невычэрпнай жыццёвай энергіі!
Матэрыял падрыхтаваны навукова-даследчым аддзелам бібліятэказнаўства.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы "Партрэты: гісторыя бібліятэкі ў асобах".
