9 чэрвеня спаўняецца 110 гадоў з дня нараджэння Тамары Вартанаўны Міянсаравай (1913–1990), піяністкі, заслужанай артысткі Беларусі, якая ўнесла значны ўклад у беларускае музычнае выканальніцкае мастацтва.
Нарадзілася Тамара Вартанаўна Міянсарава ў Расіі. Музыкай займалася з дзяцінства, у дванаццаць гадоў стала акампаніятарам танцавальнай студыі. Вучылася ў Стаўрапольскім музычным тэхнікуме і адначасова працавала ў балетнай студыі, драматычным тэатры, невялікім аркестры кіно. Пасля вучобы стала канцэртмайстрам на радыё ў г. Іванава (Расія). З 1932 па 1944 г. была галоўным канцэртмайстрам Ерэванскага тэатра оперы і балета. У 1937 г. скончыла фартэпіянны факультэт Ерэванскай кансерваторыі.
Тамара Міянсарава развучвала музычныя партыі для першых пастановак армянскіх нацыянальных опер “Алмаст” А. Спендыярава, “Ануш” А. Тыграняна, “Лусабацын” А. Стэпаняна, “Аршак ІІ” Т. Чухаджана, першага армянскага балета “Шчасце” А. Хачатурана. Акрамя гэтага, канцэртмайстар працавала над партыямі з сусветна вядомых класічных опер “Чыо-Чыо-сан”, “Фаўст”, “Севільскі цырульнік” і інш. Тамары Вартанаўне давялося працаваць з сусветна вядомымі спевакамі – А. Даніэлян, З. Далуханавай, П. Лісіцыян.
У гады Вялікай Айчыннай вайны піяністка пасябравала з беларускімі артыстамі, якія ў той час знаходзіліся ў эвакуацыі. Пасля вызвалення Беларусі прыехала ў Мінск і шмат гадоў прысвяціла складанай, але вельмі цікавай працы канцэртмайстра – спачатку ў Дзяржаўным Вялікім тэатры оперы і балета БССР (1944–1948), потым у Дзяржаўным камітэце па тэлебачанні і радыёвяшчанні (да 1985 г.). За гэты час яна сыграла тысячы канцэртаў, зрабіла шмат запісаў для фанатэкі беларускага тэлебачання і радыё. Дзякуючы яе майстэрству атрымалі сцэнічнае і канцэртнае жыццё лепшыя ўзоры беларускага опернага мастацтва: “Алеся” Я. Цікоцкага, “Кастусь Каліноўскі” Д. Лукаса, “Марынка” і “Машэка” Р. Пукста, “Андрэй Касценя” М. Аладава, “Страшны двор” С. Манюшкі і інш.
Тамара Міянсарава была таленавітым майстрам, яе бясконцая адданасць справе, улюблёнасць у музыку заслугоўваюць высокага прызнання. У 1966 г. вядомая піяністка атрымала ганаровае званне заслужанай артысткі БССР. Тамара Вартанаўна заўсёды магла падказаць, якія творы лепш уключыць у канцэртную праграму, як зручней зрабіць партыю фартэпіяна, чым узбагаціць і пашырыць рэпертуар. З ёй працавалі такія выдатныя беларускія вакалісты, як Л. Аляксеева, Т. Ніжнікава, Н. Ткачэнка, Т. Шышко, М. Дзянісаў, В. Глушакоў, інструменталісты А. Астрамецкі, Л. Гарэлік, М. Шмелькін і інш. У кожным выступленні адчуваўся творчы почырк канцэртмайстра, яе прафесіяналізм.
Цудоўная піяністка, вопытны канцэртмайстар-акампаніятар, музыкант з тонкім мастацкім густам, Тамара Міянсарава была сапраўдным знатаком беларускага музычнага мастацтва. Актыўна прапагандавала музыку беларускіх кампазітараў, часта з’яўлялася першай выканаўцай іх твораў.
Інфармацыю аб Т.В. Міянсаравай можна знайсці таксама ў анлайн-энцыклапедыі “Беларусь у асобах і падзеях”, бібліяграфія на яе гуказапісы змешчана ў электронным каталогу Нацыянальнай бібліятэкі Беларусі.
Матэрыял падрыхтаваны навукова-даследчым аддзелам бібліяграфіі.
