Гэта бібліяграфічны бюлетэнь, з дапамогай якога Нацыянальная бібліятэка Беларусі штомесяц знаёміць з навінкамі айчыннага кнігавыдання і асноўнымі падзеямі гісторыка-культурнага жыцця краіны і свету.
Гісторыя з’яўлення бюлетэня звязана з імкненнем у другой палове ХХ стагоддзя арганізаваць аператыўнае рэкамендацыйнае інфармаванне пра лепшую новую літаратуру. На працягу 60 гадоў выданне захоўвае свае жанравыя асаблівасці. Кожны выпуск бюлетэня складаецца з асноўнай часткі і дадаткаў. Асноўная частка ўяўляе сабой згрупіраваныя па тэматычных раздзелах бібліяграфічныя звесткі пра кнігі беларускіх выдавецтваў (прыярытэтную групу складаюць навукова-гуманітарныя, навукова-папулярныя), найбольш актуальныя і значныя для грамадскасці артыкулы з айчынных часопісаў, а таксама рэцэнзіі на беларускія выданні. Усе матэрыялы знаходзяць адлюстраванне ў дапаможных паказальніках – персанальным, геаграфічным і прадметным, якія штогод змяшчаюцца ў апошнім нумары выдання. У якасці дадаткаў друкуюцца бібліяграфічныя спісы або агляды, прысвечаныя значным гістарычным падзеям і актуальным пытанням сучаснага развіцця Беларусі, штогадовы пералік юбілейных дат “Беларускі каляндар, ... год”, а таксама матэрыялы да юбілеяў выдатных дзеячаў, шэрага арганізацый і ўстаноў краіны.
Унёсак у развіццё бюлетэня, яго змест і методыку складання зрабіла некалькі пакаленняў бібліёграфаў Нацыянальная бібліятэкі Беларусі. У розныя гады гэта былі супрацоўнікі аддзела беларускай літаратуры і бібліяграфіі, навукова-метадычнага і рэдакцыйна-выдавецкага аддзелаў, навукова-бібліяграфічнага аддзела, аддзела фарміравання праблемна-арыентаванай інфармацыйнай прадукцыі, на сучасным этапе – навукова-даследчага аддзела бібліяграфіі.
Ля вытокаў стварэння бюлетэня стаялі першы дырэктар бібліятэкі І.Б. Сіманоўскі, заслужаны дзеяч культуры Беларусі А.П. Дземчанкава (фота злева), Н.В. Каляда (фота справа)
На пачатку выпуску дапаможніка складаннем бібліяграфічных матэрыялаў займаліся Ф.І. Мільчына, В.Н. Дышыневіч, Т.І. Грынкевіч, Р.І. Кулагіна. Шмат гадоў прысвяцілі бюлетэню выдатныя бібліёграфы М.А. Каваленка, Т.К. Лазарук, З.Л. Елісавецкая, А.В. Мураўёва, Т.Я. Мамедава, К.Д. Варанько, І.В. Нарчук, Г.В. Брага і інш. За час свайго існавання “Новыя кнігі…” набылі аўтарытэт у прафесійным асяроддзі, заўсёды мелі значную колькасць падпісчыкаў.
Сёння бібліяграфічны бюлетэнь “Новыя кнігі: па старонках беларускага друку” – добры дарадца і нязменны памочнік для розных катэгорый чытачоў, незалежна ад узроўню іх падрыхтоўкі, узросту, адукацыі, прафесійных і асабістых інтарэсаў. Ён заўсёды ўтрымлівае цікавыя рубрыкі, спалучае бібліяграфічную інфармацыю з разнастайнымі аналітычнымі матэрыяламі і з’яўляецца незаменнай крыніцай беларусазнаўчай інфармацыі.
Усе нумары і дадаткі бюлетэня “Новыя кнігі: па старонках беларускага друку”, а таксама наяўнасць іх лічбавых копій можна ўбачыць праз электронны каталог НББ. Падрабязная характарыстыка выдання прыводзіцца ў фактаграфічнай базе даных “Беларусь у асобах і падзеях”, якая спалучае інфармацыю пра вядомых людзей айчыннай гісторыі, найбольш уплывовыя айчынныя перыядычныя выданні і іншыя важныя аб’екты і падзеі ў эканамічнай, грамадска-палітычнай, культурнай сферах жыцця нашай краіны.
Матэрыял прадастаўлены навукова-даследчым аддзелам бібліяграфіі.
