Знакамітая бітва паміж злучаным войскам Польскага Каралеўства і Вялікага Княства Літоўскага (на чале з каралём Польшчы Ягайлам і вялікім князем літоўскім Вітаўтам) і войскам Тэўтонскага ордэна пад камандаваннем вялікага магістра Ульрыха фон Юнгінгена адбылася ў перыяд Вялікай вайны (1409–1411) недалёка ад вёсак Грунвальд, Таненберг і Людвігсдорф (Людвігова) на тэрыторыі Усходняй Прусіі (сучасная Польшча).
Па маштабах і палітычнаму значэнню бітва была адной з буйнейшых у сярэднявечнай Еўропе. Гэта эпахальная падзея прадвызначыла лёс многіх дзяржаў і народаў, пакінула значны след і ў беларускай гісторыі. Разгром Тэўтонскага ордэна паклаў пачатак яго палітычнаму заняпаду, спыніў шматвяковую экспансію крыжакоў на славянскія і прыбалтыйскія землі. У выніку грунвальдскай перамогі ВКЛ атрымала выхад на балтыйскія гандлёвыя шляхі, што спрыяла эканамічнаму росту і развіццю дзяржавы.
Аб Грунвальдскай бітве пакінулі сведчанні летапісы і хронікі, гэта знакавая баталія прыцягвала ўвагу многіх гісторыкаў, даследчыкаў і пісьменнікаў. Сярод іх – М. Стрыйкоўскі, Я. Длугаш, Т. Нарбут, А. Лявіцкі, Ю. Крашэўскі, Г. Сянкевіч, Г. Дэльбрук, Д. Даўгяла. Гістарычная падзея стала крыніцай натхнення для графікаў і жывапісцаў (М. Андрыёлі, Я. Матэйка, В. і Ю. Косакі, Я. Дамель, А. Муха і інш.), кампазітараў і музыкантаў.
У фондах Нацыянальнай бібліятэкі Беларусі захоўваецца буйная калекцыя дакументаў (манаграфіі, зборнікі, артыкулы, выяўленчыя матэрыялы, ноты, гуказапісы і г.д.) па названай тэме на беларускай, польскай, рускай, літоўскай і іншых мовах. Да 600-гадовага юбілею падзеі бібліятэка выпусціла камплект паштовак “Грунвальдская бітва ў выявах: па матэрыялах з фондаў Нацыянальнай бібліятэкі Беларусі”.
Атрымаць інфармацыю пра ўсе гэтыя дакументы можна праз электронны каталог НББ. У зводным ЭІР “Нацыянальная бібліяграфія Беларусі” прадстаўлены звесткі і пра тыя выданні, якія адсутнічаюць у бібліятэках нашай краіны. Падрабязнае апісанне Грунвальдскай бітвы змешчана ў фактаграфічнай базе даных “Беларусь у асобах і падзеях”.
Матэрыял пададзены навукова-даследчым аддзелам бібліяграфіі.
