“Беларуская Энцыклапедыя імя Петруся Броўкі” падрыхтавала да выдання энцыклапедычны даведнік, прысвечаны гісторыі Жыровіцкага Успенскага манастыра, абразу Жыровіцкай Маці Божай, а таксама паселішчу Жыровічы Слонімскага раёна.
Праект, які ўклаў кандыдат багаслоўя, дацэнт, прарэктар Мінскай духоўнай семінарыі А. В. Слесараў, прысвечаны 550-годдзю з’яўлення ўнікальнай нацыянальнай, праваслаўнай святыні – абраза Жыровіцкай Маці Божай. Гэта рэліквія прызнана і праваслаўнай, і каталіцкай канфесіямі цудатворнай хрысціянскай святыняй.
У энцыклапедычнае выданне, якое выйдзе накладам 1000 экзэмпляраў, уваходзіць болей за 200 энцыклапедычных артыкулаў. Сярод аўтараў даведніка – намеснік Жыровіцкага манастыра, рэктар Мінскай духоўнай семінарыі М. П. Альпак (архіепіскап Навагрудскі і Слонімскі Гурый), першы прарэктар Мінскай духоўнай семінарыі Ю. М. Сакалоў (іераманах Афанасій), свяшчэннік, прафесар Мінскай духоўнай семінарыі Г. Э. Шчаглоў, дацэнт Беларускай дзяржаўнай акадэміі мастацтваў Г. А. Лаўрэцкі, пратадыякан, выкладчык Мінскай духоўнай акадэміі і Мінскай духоўнай семінарыі П. У. Бубнаў.
Аўтар публікацыі: Сяргей Шычко.
Крыніца: «Созвучие»
