На юбілейны Дзень беларускага пісьменства чакаюць каля 100 айчынных літаратараў.
Амаль сто беларускіх пісьменнікаў – па дзесяць чалавек ад кожнай вобласці і трыццаць – ад сталіцы ўключаны ў склад дэлегацыі, якая прыме ўдзел у ХХ Дні беларускага пісьменства у Быхаве.
Як адзначае старшыня Саюза пісьменнікаў Беларусі Мікалай Чаргінец, гэтае свята для літаратараў асаблівае, тым і тлумачыцца такое шырокае прадстаўніцтва і самы актыўны ўдзел у ім з боку творчай пісьменніцкай арганізацыі.
Пад час сёлетняга Дня беларускага пісьменства запланаваны шэраг творчых сустрэч літаратараў з чытачамі, удзел у аўтограф-сесіях, прэзентацыях новых выданняў, навукова-практычнай канферэнцыі.
Адной з першых падзей у дзень урачыстага адкрыцця свята на яго асноўнай пляцоўцы стане цырымонія ўзнагароджання пераможцаў рэспубліканскага конкурсу на лепшы літаратурны твор.
Беларускія і замежныя пісьменнікі возьмуць удзел у пасяджэнні міжнароднага круглага стала “Сугучча: мова і літаратура ў кантэксце гісторыка-культурнай спадчыны”. Пад час гэтага мерапрыемства адбудзецца яшчэ адна цікавая падзея – прэзентацыя кніжнага праекта “Сугучча сэрцаў”, сааўтарам якога разам з Міністэрствам інфармацыі і выдавецкім домам “Звязда” выступае Саюз пісьменнікаў Беларусі. У свет выходзяць адзінаццаць кніжак, прысвечаных літаратурам краін СНД, у якiх прадстаўлены творы пісьменнікаў краін Садружнасці, напісаныя ў асноўным пасля 1991 года.
Яшчэ адзін важкі пісьменніцкі ўнёсак да юбілейнага Дня беларускага пісьменства – стварэнне гімна гэтаму святу, які ўпершыню прагучыць пад час яго адкрыцця. Тэкст урачыстага твора напісаў аўтар многіх папулярных песень, паэт Алесь Бадак, музыку – вядомы кампазітар Алег Елісеенкаў.
Аўтар публікацыі: Ірына Свірко.
Крыніца: газета “Рэспубліка”
Чытайце таксама:
